എൻഡോമെട്രിയൽ ക്യാൻസർ ; പ്രധാനപ്പെട്ട ലക്ഷണങ്ങൾ എന്തെല്ലാം?

സ്ത്രീകളെ ബാധിക്കുന്ന പ്രധാന ക്യാൻസറുകളിലൊന്നായ എൻഡോമെട്രിയൽ ക്യാൻസറിനെക്കുറിച്ച് (ഗർഭാശയ ക്യാൻസർ) ജാഗ്രത പാലിക്കേണ്ടതുണ്ടെന്ന് ആരോഗ്യരംഗത്തെ വിദഗ്ധർ ചൂണ്ടിക്കാണിക്കുന്നു. ഗർഭാശയത്തിന്റെ ഉൾപാളിയായ എൻഡോമെട്രിയത്തിൽ രൂപപ്പെടുന്ന ഈ രോഗം പ്രാരംഭ ഘട്ടത്തിൽ തന്നെ തിരിച്ചറിയാൻ സാധിക്കുമെന്നതാണ് ആശ്വാസകരം.

പ്രധാന ലക്ഷണങ്ങൾ

അസാധാരണമായ ഗർഭാശയ രക്തസ്രാവമാണ് രോഗത്തിന്റെ ഏറ്റവും പ്രധാനപ്പെട്ട ലക്ഷണം. ആർത്തവവിരാമത്തിന് ശേഷമുണ്ടാകുന്ന രക്തസ്രാവം, അല്ലെങ്കിൽ ആർത്തവവിരാമത്തിന് മുമ്പുള്ള അസാധാരണവും കനത്തതുമായ ആർത്തവം എന്നിവ പ്രത്യേകം ശ്രദ്ധിക്കണം. വെള്ളമുള്ളതോ രക്തം കലർന്നതോ ആയ യോനി ഡിസ്ചാർജ്, പെൽവിക് വേദന, അനാവശ്യമായി ശരീരഭാരം കുറയൽ, വയറു വീർക്കൽ, തുടർച്ചയായ ക്ഷീണം എന്നിവയും ലക്ഷണങ്ങളാണ്.

കാരണങ്ങളും അപകടസാധ്യതകളും

അമിതവണ്ണം, പ്രമേഹം, അനിയന്ത്രിതമായ ജീവിതശൈലി, ഹോർമോൺ വ്യതിയാനങ്ങൾ (നേരത്തെയോ വൈകിയോ ഉള്ള ആർത്തവവിരാമം, പി.സി.ഒ.എസ്, ഈസ്ട്രജൻ മാത്രമുള്ള ഹോർമോൺ തെറാപ്പി), ഉയർന്ന രക്തസമ്മർദ്ദം എന്നിവ രോഗസാധ്യത വർധിപ്പിക്കുന്നു. ജനിതക പാരമ്പര്യമുള്ളവരിലും (ഉദാഹരണത്തിന് 'ലിഞ്ച് സിൻഡ്രോം') രോഗബാധയ്ക്ക് സാധ്യത കൂടുതലാണ്.

വളരുന്ന കണക്കുകൾ

അവസാനമായി പുറത്തുവന്ന ഗ്ലോബോക്കാൻ (GLOBOCAN) കണക്കുകൾ പ്രകാരം ആഗോളതലത്തിൽ 4,34,620 പുതിയ കേസുകളും 1,00,680 മരണങ്ങളും റിപ്പോർട്ട് ചെയ്തിട്ടുണ്ട്. ഇന്ത്യയിൽ 28,308 പുതിയ കേസുകളും 6,362 മരണങ്ങളുമാണ് രേഖപ്പെടുത്തിയത്. നിലവിൽ ഏകദേശം 73,800 സ്ത്രീകൾ രാജ്യത്ത് രോഗബാധിതരായി കഴിയുന്നുണ്ടെന്നാണ് വിവരങ്ങൾ.

ചികിത്സയും മുൻകരുതലുകളും

അസാധാരണമായ രക്തസ്രാവമോ മറ്റ് ലക്ഷണങ്ങളോ കണ്ടാൽ ഉടൻ തന്നെ വിദഗ്ധ ഡോക്ടറുടെ സേവനം തേടണം. എൻഡോമെട്രിയൽ ബയോപ്സി വഴി രോഗനിർണയം സ്ഥിരീകരിക്കാം. പ്രാരംഭ ഘട്ടത്തിൽ തന്നെ കണ്ടെത്തിയാൽ ശസ്ത്രക്രിയയിലൂടെ ഗർഭപാത്രം നീക്കം ചെയ്ത് രോഗം പൂർണമായി ഭേദമാക്കാൻ സാധിക്കും.