ഈ ഭക്ഷണങ്ങൾ വൻകുടൽ ക്യാൻസറിനുള്ള സാധ്യത കൂട്ടുന്നു

അൾട്രാ-പ്രോസസ്ഡ് ഭക്ഷണങ്ങളുടെ (UPF) അമിത ഉപഭോഗം വൻകുടൽ-മലാശയ ക്യാൻസറിനുള്ള (കൊളോറെക്റ്റൽ ക്യാൻസർ) സാധ്യത ഗണ്യമായി വർധിപ്പിക്കുന്നതായി കണ്ടെത്തൽ. 'ദി ബി.എം.ജെ' (The BMJ), 'ഫ്രോണ്ടിയേഴ്സ് ഇൻ ന്യൂട്രിഷൻ' (Frontiers in Nutrition) എന്നീ പ്രമുഖ മെഡിക്കൽ ജേണലുകളിൽ പ്രസിദ്ധീകരിച്ച പഠനങ്ങളിലാണ് ഇതേക്കുറിച്ചുള്ള മുന്നറിയിപ്പുള്ളത്.

ദൈനംദിന ഭക്ഷണക്രമത്തിൽ അൾട്രാ-പ്രോസസ്ഡ് ഭക്ഷണങ്ങളുടെ അളവിൽ ഉണ്ടാകുന്ന ഓരോ 10 ശതമാനം വർധനവും വൻകുടൽ ക്യാൻസർ സാധ്യത നാല് ശതമാനം ഉയർത്തുന്നതായി ഗവേഷണങ്ങൾ വ്യക്തമാക്കുന്നു. സ്വാഭാവിക പോഷകങ്ങൾ നഷ്ടപ്പെട്ടതും കലോറി ഉയർന്നതുമായ ഇത്തരം ഭക്ഷണങ്ങൾ അമിതവണ്ണം, ഹൃദ്രോഗം, ടൈപ്പ് 2 പ്രമേഹം തുടങ്ങിയ വിട്ടുമാറാത്ത രോഗങ്ങൾക്കും അകാല മരണത്തിനും കാരണമാകുന്നുണ്ട്.

പഞ്ചസാര, ഉപ്പ്, ഹാനികരമായ കൊഴുപ്പുകൾ, രാസവസ്തുക്കൾ എന്നിവ ഉയർന്ന അളവിലും നാരുകൾ (fiber) വളരെ കുറഞ്ഞ അളവിലുമാണ് ഇത്തരം ഭക്ഷണങ്ങളിൽ അടങ്ങിയിരിക്കുന്നത്. കുടലിന്റെ സ്വാഭാവിക പ്രവർത്തനത്തെ തരാറിലാക്കുന്നതാണ് നാരുകളുടെ ഈ കുറവ്.

ഒഴിവാക്കേണ്ട പ്രധാന അൾട്രാ-പ്രോസസ്ഡ് ഭക്ഷണങ്ങൾ:

• ഇൻസ്റ്റന്റ് നൂഡിൽസ്, പാക്കറ്റ് ചിപ്സ്, ലഘുഭക്ഷണങ്ങൾ

• ബിസ്കറ്റുകൾ, ചോക്ലേറ്റുകൾ, കേക്കുകൾ

• സോഫ്റ്റ് ഡ്രിങ്കുകൾ, പഞ്ചസാര ചേർത്ത കൃത്രിമ ജ്യൂസുകൾ

• ഇൻസ്റ്റന്റ് സൂപ്പുകൾ, ഫ്രോസൻ ഫുഡുകൾ

• ചീസ് സ്ലൈസുകൾ, സപ്രെഡുകൾ

അടുത്തിടെ പ്രമുഖ ഓങ്കോളജിസ്റ്റ് ഡോ. വർത്തിക വിശ്വാനിയും ഇൻസ്റ്റഗ്രാം കുറിപ്പിലൂടെ ഇത്തരം ഭക്ഷണങ്ങൾ ഉണ്ടാക്കുന്ന ആരോഗ്യപ്രശ്നങ്ങളെക്കുറിച്ച് മുന്നറിയിപ്പ് നൽകിയിരുന്നു. സംസ്കരിച്ച ഭക്ഷണങ്ങളുടെ ഉപയോഗം കുറച്ച് പോഷകസമ്പന്നമായ സ്വാഭാവിക ഭക്ഷണങ്ങൾ ശീലമാക്കണമെന്നാണ് വിദഗ്ധരുടെ നിർദേശം.