ഏകൻ നായകനായി എത്തുന്ന 'ഹൈക്കു' തിയേറ്റർ റിലീസിന് ശേഷം ഒടിടിയിൽ എവിടെ കാണാം?

യുവരാജ് ചിന്നസാമി സംവിധാനം ചെയ്യുന്ന ഏറ്റവും പുതിയ ചിത്രമായ 'ഹൈക്കു' ഒക്ടോബർ 23-ന് ആഗോളതലത്തിൽ തിയേറ്ററുകളിലെത്തുന്നു. വിഷൻ സിനിമ ഹൗസിന്റെ ബാനറിൽ ഡോ. ഡി. അരുളനന്ദു, മാത്യു അരുളനന്ദു എന്നിവർ ചേർന്നാണ് ചിത്രം നിർമ്മിക്കുന്നത്. തമിഴ്, തെലുങ്ക്, മലയാളം ഭാഷകളിൽ പ്രദർശനത്തിനെത്തുന്ന ചിത്രത്തിന്റെ ഡിജിറ്റൽ അവകാശം നെറ്റ്ഫ്ലിക്സ് (Netflix) സ്വന്തമാക്കി. തിയേറ്റർ റിലീസിന് ശേഷം ചിത്രം നെറ്റ്ഫ്ലിക്സിലൂടെ സ്ട്രീം ചെയ്യും.

സാധാരണയായി തിയേറ്റർ റിലീസിന് ശേഷം ഒടിടി കരാറുകളിൽ എത്തുന്ന പതിവുരീതികളിൽ നിന്ന് വ്യത്യസ്തമായി, ചിത്രീകരണം ആരംഭിച്ച ഘട്ടത്തിൽ തന്നെ നെറ്റ്ഫ്ലിക്സ് ചിത്രത്തിന്റെ സ്ട്രീമിംഗ് അവകാശം സ്വന്തമാക്കിയിരുന്നു.

'ജോ', 'കോഴിപ്പണ്ണൈ ചെല്ലദുരൈ' എന്നീ ചിത്രങ്ങളിലൂടെ ശ്രദ്ധേയനായ ഏകനാണ് ചിത്രത്തിൽ നായകനായി എത്തുന്നത്. ശ്രീദേവി അപ്പല്ല, 'മിന്നൽ മുരളി' ഫെയിം ഫെമിന ജോർജ് എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. ശക്തി ഫിലിം ഫാക്ടറിയാണ് ചിത്രത്തിന്റെ തമിഴ്‌‌നാട്ടിലെ തിയേറ്റർ വിതരണാവകാശം നേടിയിട്ടുള്ളത്. പുറത്തുവന്ന ചിത്രത്തിന്റെ ടീസറിന് മികച്ച പ്രതികരണമാണ് പ്രേക്ഷകരിൽ നിന്ന് ലഭിക്കുന്നത്.

'ജോ' എന്ന ചിത്രത്തിന്റെ സംവിധായകൻ ഹരിഹരൻ റാം ആണ് ചിത്രത്തിന് അഡീഷണൽ സ്ക്രീൻപ്ലേ ഒരുക്കുന്നത്. പ്രിയേഷ് ഗുരുസ്വാമി ഛായാഗ്രഹണവും ശക്തി പ്രണേഷ് എഡിറ്റിംഗും നിർവ്വഹിക്കുന്നു. 'കോർട്ട്', 'ബേബി' തുടങ്ങിയ ചിത്രങ്ങളിലൂടെ ശ്രദ്ധേയനായ വിജയ് ബുൾഗാനിനാണ് സംഗീത സംവിധാനം.