വിമാനയാത്രയ്ക്ക് ചെലവേറും? ഇന്ധനവിലയിൽ വൻ വർധന; ലിറ്ററിന് 137 രൂപ

രാജ്യത്ത് വിമാന ഇന്ധന (എടിഎഫ്) വിലയിൽ വൻ വർധനവ്. ലിറ്ററിന് 16 രൂപ കൂട്ടിയതോടെ ഒക്ടോബർ ഒന്നു മുതൽ പുതിയ വില 137 രൂപയായി ഉയർന്നതായി പൊതുമേഖലാ എണ്ണക്കമ്പനികൾ അറിയിച്ചു. ഇതോടെ വരും ദിവസങ്ങളിൽ വിമാന ടിക്കറ്റ് നിരക്കുകൾ കുത്തനെ ഉയർന്നേക്കും. വിമാന ഇന്ധനത്തിന് പുറമെ 19 കിലോഗ്രാം വാണിജ്യ പാചകവാതക സിലിണ്ടറിന് 62.50 രൂപയും വർധിപ്പിച്ചു.

തുടർച്ചയായ മൂന്നാം മാസമാണ് വിമാന ഇന്ധനവില ഉയരുന്നത്. ഓഗസ്റ്റിൽ ലിറ്ററിന് അഞ്ച് രൂപയും സെപ്റ്റംബറിൽ 6.28 രൂപയും വർധിപ്പിച്ചിരുന്നു. എന്നാൽ ഒക്ടോബറിലെ 16 രൂപയുടെ വർധന വിമാനക്കമ്പനികൾക്ക് കനത്ത തിരിച്ചടിയാണ്. 121 രൂപയിൽ നിന്നാണ് വില 137 രൂപയിലേക്ക് കുതിച്ചത്. അന്താരാഷ്ട്ര വിപണിയിലെ ക്രൂഡോയിൽ വിലവ്യതിയാനവും ഡോളറിനെതിരെ രൂപയുടെ മൂല്യത്തിലുണ്ടായ ഇടിവുമാണ് പെട്ടെന്നുള്ള വിലവർധനവിന് കാരണം.

വിമാനക്കമ്പനികളുടെ മൊത്തം പ്രവർത്തനച്ചെലവിന്റെ 40 ശതമാനം വരെയും ചെലവാകുന്നത് ഇന്ധനത്തിനാണ്. പുതിയ സാഹചര്യത്തിൽ സർവീസ് ചെലവിലുണ്ടാകുന്ന അധിക ബാധ്യത യാത്രക്കാരിലേക്ക് കൈമാറാൻ കമ്പനികൾ നിർബന്ധിതരായേക്കും. വരാനിരിക്കുന്ന അവധിക്കാലത്ത് യാത്രാ പദ്ധതികൾ തയ്യാറാക്കുന്നവർക്ക് ടിക്കറ്റ് നിരക്കിലെ ഈ വർധനവ് കനത്ത തിരിച്ചടിയാകും.

വാണിജ്യ സിലിണ്ടർ വിലയും കൂട്ടി; ഗാർഹികാവശ്യത്തിനുള്ളതിന് മാറ്റമില്ല

ഹോട്ടലുകളും റെസ്റ്റോറന്റുകളും കാറ്ററിങ് സ്ഥാപനങ്ങളും ഉപയോഗിക്കുന്ന 19 കിലോഗ്രാം വാണിജ്യ പാചകവാതക സിലിണ്ടറിന് 62.50 രൂപ വർധിപ്പിച്ചത് ഭക്ഷണശാലകളുടെ പ്രവർത്തനച്ചെലവിനെയും ബാധിക്കും. ഇത് ഹോട്ടൽ ഭക്ഷണ നിരക്കുകളിലും താമസച്ചെലവിലും പ്രതിഫലിക്കാൻ സാധ്യതയുണ്ട്.

അതേസമയം, വീടുകളിൽ ഉപയോഗിക്കുന്ന 14.2 കിലോഗ്രാം ഗാർഹിക പാചകവാതക സിലിണ്ടർ വിലയിൽ മാറ്റം വരുത്തിയിട്ടില്ല. നിലവിൽ 942 രൂപയാണ് ഒരു സിലിണ്ടറിന്റെ വില. പെട്രോൾ, ഡീസൽ നിരക്കുകളും മാറ്റമില്ലാതെ തുടരുകയാണ്.