പൃഥ്വിരാജ് സുകുമാരനെ നായകനാക്കി വൈശാഖ് സംവിധാനം ചെയ്ത ഏറ്റവും പുതിയ ചിത്രം ‘ഖലീഫ’ തിയറ്ററുകളിൽ വൻ വിജയം നേടുന്നു. ഓഗസ്റ്റ് 20-ന് റിലീസ് ചെയ്ത ചിത്രം ഇതിനോടകം ആഗോളതലത്തിൽ 30 കോടി രൂപ സ്വന്തമാക്കിയതായി ഔദ്യോഗിക റിപ്പോർട്ടുകൾ വ്യക്തമാക്കുന്നു. വിദേശത്തുനിന്ന് മാത്രം 14 കോടി രൂപ ചിത്രം കളക്ട് ചെയ്തതായി പ്രമുഖ ബോക്സ് ഓഫീസ് ട്രാക്കർമാരായ സാക്നിൽക്ക് റിപ്പോർട്ട് ചെയ്യുന്നു. U/A 16+ സർട്ടിഫിക്കറ്റ് ലഭിച്ച ചിത്രത്തിൽ മാമ്പറയ്ക്കൽ ആമിർ അലിയായി പൃഥ്വിരാജ് എത്തുമ്പോൾ മാമ്പറയ്ക്കൽ അഹമ്മദ് അലിയെന്ന അതിഥി വേഷത്തിൽ മോഹൻലാലും പ്രത്യക്ഷപ്പെടുന്നുണ്ട്.
ജിനു എബ്രഹാം തിരക്കഥയും നിർമ്മാണവും നിർവ്വഹിച്ച ചിത്രം ജിനു ഇന്നോവേഷൻസിന്റെ ബാനറിലാണ് തീയറ്ററുകളിലെത്തിയത്. മാളവിക ശർമ്മ നായികയാകുന്ന ചിത്രത്തിൽ രഞ്ജി പണിക്കർ, ശിവജിത്, ഇന്ദ്രൻസ്, ഷമ്മി തിലകൻ തുടങ്ങിയ വൻ താരനിര അണിനിരക്കുന്നു. ജോമോൻ ടി ജോൺ ഛായാഗ്രഹണവും ചമൻ ചാക്കോ എഡിറ്റിംഗും നിർവ്വഹിച്ച ചിത്രത്തിന്റെ സംഗീത സംവിധായകൻ ജേക്സ് ബിജോയാണ്. യാനിക്ക് ബെൻ, ഫീനിക്സ് പ്രഭു, ചേതൻ ഡിസൂസ എന്നിവർ ഒരുക്കിയ ആക്ഷൻ രംഗങ്ങളും സോഷ്യൽ മീഡിയയിൽ ഏറെ തരംഗമായിക്കഴിഞ്ഞു.
