മധുരപ്രിയരല്ലാത്തവരെപ്പോലും കൊതിപ്പിക്കുന്ന ഒന്നാണ് ചീസ് കേക്കുകൾ. നാവിൽ കപ്പലോടിക്കുന്ന ക്രീമി രൂപവും തനിമയാർന്ന രുചിയുമാണ് ഇതിനെ ലോകമെമ്പാടുമുള്ള ഭക്ഷണപ്രേമികളുടെ പ്രിയപ്പെട്ട വിഭവമാക്കുന്നത്. എന്നാൽ, വെറുമൊരു മധുരപലഹാരം എന്നതിലുപരി ലോകത്തെ അമ്പരപ്പിച്ച ഒട്ടനവധി റെക്കോർഡുകളും ചീസ് കേക്കിന്റെ പേർക്കുമേലുണ്ട്. ലക്ഷങ്ങൾ വിലമതിക്കുന്ന രാജകീയ കേക്ക് മുതൽ ടൺ കണക്കിന് ഭാരമുള്ള ഭീമൻ കേക്കുകൾ വരെ നീളുന്നു ആ കൗതുക വിശേഷങ്ങൾ.
വില കേട്ടാൽ ഞെട്ടും; ലക്ഷങ്ങൾ വിലയുള്ള കേക്ക്
ലോകത്തിലെ ഏറ്റവും വിലയേറിയ ചീസ് കേക്ക് നിർമ്മിച്ച് ഗിന്നസ് ബുക്കിൽ ഇടംനേടിയത് ന്യൂയോർക്ക് സിറ്റിയിലെ ‘റിസ്റ്റോറന്റെ റഫേലെ’യിലെ ഷെഫായ റാഫേലെ റോങ്കയാണ്. 2017 ഒക്ടോബർ 30-നായിരുന്നു ഭക്ഷണലോകത്തെ അതിശയിപ്പിച്ച ഈ അപൂർവ്വ കേക്കിന്റെ പിറവി. 4,592.42 ഡോളറായിരുന്നു ഇതിന്റെ വില. അതായത് നമ്മുടെ ഇന്ത്യൻ രൂപയിൽ ഏകദേശം 4.4 ലക്ഷത്തോളം രൂപ!
ഇത്രയധികം തുകയാകാൻ കാരണമെന്തെന്നല്ലേ? ചേരുവകളുടെ ആഡംബരം തന്നെ! ഇറ്റലിയിലെ ആൽബയിൽ നിന്ന് പ്രത്യേകമായി ഇറക്കുമതി ചെയ്ത വൈറ്റ് ട്രഫിളുകൾ, എരുമപ്പാലിൽ നിർമ്മിച്ച റിക്കോട്ട ചീസ്, മഡഗാസ്കർ വാനില, ഹെന്നസി പാരഡിസ് കൊഗ്നാക് എന്നിവയാണ് ഇതിനായി ഉപയോഗിച്ചത്. ഇതിനെല്ലാം പുറമെ 200 വർഷം പഴക്കമുള്ള അപൂർവ്വ ബാൽസാമിക് വിനാഗിരിയും കഴിക്കാൻ പാകത്തിലുള്ള 24 ക്യാരറ്റ് സ്വർണ്ണ ഇലകളും ഉപയോഗിച്ചാണ് ഈ ലക്ഷ്വറി കേക്ക് അലങ്കരിച്ചത്.
6,800 കിലോ ഭാരമുള്ള ഭീമൻ കേക്ക്!
വിലയിൽ മാത്രമല്ല, വലിപ്പത്തിന്റെ കാര്യത്തിലും ചീസ് കേക്കുകൾ ചരിത്രം സൃഷ്ടിച്ചിട്ടുണ്ട്. യു.എസ്.എയിലെ ന്യൂയോർക്കിലുള്ള ലോവില്ലെയിലെ ഫിലാഡെൽഫിയ ക്രീം ചീസ് ആണ് ലോകത്തിലെ ഏറ്റവും വലിയ ചീസ് കേക്ക് തയാറാക്കി റെക്കോർഡ് സ്വന്തമാക്കിയത്. 2024 സെപ്റ്റംബർ 20-നായിരുന്നു ഈ അപൂർവ്വ നേട്ടം.
6,807.5 കിലോഗ്രാമായിരുന്നു ഈ കൂറ്റൻ കേക്കിന്റെ ആകെ ഭാരം! 5,896.7 കിലോഗ്രാം ചീസ് കേക്ക് ഫില്ലിംഗ്, 394 കിലോഗ്രാം ഗ്രഹാം ക്രാക്കർ പൊടി, 136 കിലോ പഞ്ചസാര, 45 കിലോ വെണ്ണ എന്നിവ സമാഹരിച്ചാണ് ഈ വിഭവം ഒരുക്കിയത്. 11 അടിയിലധികം വ്യാസമുണ്ടായിരുന്ന ഈ ഭീമൻ കേക്ക് കൗതുക കാഴ്ചയായിരുന്നു.
മൂന്ന് ഫുട്ബോൾ ഗ്രൗണ്ടിന്റെ നീളത്തിൽ ഒരു കേക്ക്
ലോകത്തിലെ ഏറ്റവും നീളമേറിയ ചീസ് കേക്ക് നിർമ്മിച്ചതിന്റെ ക്രെഡിറ്റ് ഇറ്റലിക്കാർക്കാണ്. 2002-ൽ സിസിലിയൻ പേസ്ട്രി ഷെഫ് അസോസിയേഷൻ നിർമ്മിച്ച നീളൻ റോളോ ചീസ് കേക്കിന് 303 മീറ്റർ (994 അടി) നീളമുണ്ടായിരുന്നു. അതായത്, അടുത്തടുത്തായി കിടക്കുന്ന മൂന്ന് വലിയ ഫുട്ബോൾ ഗ്രൗണ്ടുകളുടെ അത്രയും നീളം! ഒരിടത്തുപോലും പൊട്ടിപ്പോകാതെ പരമ്പരാഗത ഇറ്റാലിയൻ റോളോ ശൈലിയിലാണ് ഈ കേക്ക് ചുരുട്ടിയെടുത്ത് തയ്യാറാക്കിയത്.
9 മിനിറ്റിൽ 5 കിലോ കേക്ക് അകത്താക്കി!
സാധാരണയായി ചീസ് കേക്ക് വളരെ സാവധാനം ആസ്വദിച്ചു കഴിക്കുന്ന ഒന്നാണ്. എന്നാൽ സോണിയ തോമസ് എന്ന യുവതിക്ക് ഇതൊരു തകർപ്പൻ മത്സരമായിരുന്നു. വേഗത്തിൽ ഭക്ഷണം കഴിച്ച് മത്സരങ്ങളിൽ വിജയിക്കുന്നതിൽ പ്രശസ്തയായ ഇവർ ‘ദ ബ്ലാക്ക് വിഡോ’ എന്നാണ് അറിയപ്പെടുന്നത്.
2004 സെപ്റ്റംബർ 26-ന് ന്യൂയോർക്കിലെ ബ്രൂക്ലിനിൽ നടന്ന ഡൗൺടൗൺ അറ്റ്ലാന്റിക് ചീസ് കേക്ക് ഈറ്റിങ് ചാമ്പ്യൻഷിപ്പിലാണ് സോണിയ ഈ അവിശ്വസനീയ നേട്ടം സ്വന്തമാക്കിയത്. വെറും 9 മിനിറ്റ് കൊണ്ടാണ് ഇവർ 5 കിലോഗ്രാം ചീസ് കേക്ക് തിന്നുതീർത്തത്. ഇതോടെ വേഗത്തിൽ ചീസ് കേക്ക് കഴിക്കുന്ന ലോക റെക്കോർഡും സോണിയ സ്വന്തം പേരിൽ കുറിച്ചു.
