മുംബൈ: ഗ്ലാമറും ക്രിക്കറ്റും ബിസിനസും സമന്വയിക്കുന്ന ഇന്ത്യൻ പ്രീമിയർ ലീഗിന്റെ (ഐപിഎൽ) ചരിത്രത്തിലെ മറക്കാനാകാത്ത അധ്യായങ്ങളിലൊന്നാണ് രാജസ്ഥാൻ റോയൽസും അതിനു ചുറ്റുമുണ്ടായ വിവാദങ്ങളും. ഇപ്പോഴിതാ ഫ്രാഞ്ചൈസി സ്വന്തമാക്കിയ കാലത്തെക്കുറിച്ചും ഐപിഎല്ലിനെ പറ്റിപ്പറ്റിയ വിവാദങ്ങളെക്കുറിച്ചും വെളിപ്പെടുത്തലുകളുമായി രംഗത്തെത്തിയിരിക്കുകയാണ് വ്യവസായി രാജ് കുന്ദ്ര.
തന്റെ ഭാര്യയും ബോളിവുഡ് നടിയുമായ ശിൽപ ഷെട്ടിക്ക് നൽകിയ വാലന്റൈൻസ് ഡേ സമ്മാനമായിരുന്നു രാജസ്ഥാൻ റോയൽസ് ടീമിലെ ഓഹരികളെന്ന് അടുത്തിടെ നൽകിയ ഒരു യൂട്യൂബ് അഭിമുഖത്തിൽ രാജ് കുന്ദ്ര തുറന്നുപറഞ്ഞു.
പ്രണയസമ്മാനത്തിൽ നിന്ന് കോടികളുടെ സാമ്രാജ്യത്തിലേക്ക്
രാജസ്ഥാൻ റോയൽസിന്റെ ഓഹരികൾ സ്വന്തമാക്കാനായി അന്ന് ഏകദേശം 81.9 കോടി രൂപയാണ് രാജ് കുന്ദ്ര നിക്ഷേപിച്ചത്. താൻ നിക്ഷേപം നടത്തുമ്പോൾ ഐപിഎൽ ടീമിന്റെ ആകെ മൂല്യം 700 കോടി രൂപയോളമായിരുന്നുവെങ്കിൽ, ഇന്നത് 16,000 കോടി രൂപയോളമായി ഉയർന്നതായി അദ്ദേഹം ചൂണ്ടിക്കാട്ടി. എന്നാൽ, നിലവിൽ മിത്തൽ കുടുംബം, അദാർ പൂനവല്ല, മനോജ് ബദലെ എന്നിവരുൾപ്പെടുന്ന കൺസോർഷ്യത്തിന്റെ കൈകളിലാണ് ടീമിന്റെ ഉടമസ്ഥാവകാശം.
കരിനിഴൽ വീഴ്ത്തിയ വാതുവെപ്പ് വിവാദം
2013-ലെ ഐപിഎൽ വാതുവെപ്പ് വിവാദമാണ് രാജ് കുന്ദ്രയുടെ കരിയറിൽ വലിയ തിരിച്ചടിയായത്. റോയൽസിന്റെ സഹഉടമയായിരുന്ന കുന്ദ്രയ്ക്കെതിരെ നിയമവിരുദ്ധമായി വാതുവെപ്പ് നടത്തിയെന്ന ആരോപണം ഉയർന്നു. തുടർന്ന് സുപ്രീം കോടതി നിയോഗിച്ച ജസ്റ്റിസ് ലോധ കമ്മിറ്റിയുടെ അന്വേഷണത്തെ തുടർന്ന് 2015-ൽ അദ്ദേഹത്തിന് ക്രിക്കറ്റ് സംബന്ധമായ കാര്യങ്ങളിൽ നിന്ന് ആജീവനാന്ത വിലക്ക് ഏർപ്പെടുത്തി. ഇതേത്തുടർന്ന് 2016, 2017 സീസണുകളിൽ രാജസ്ഥാൻ റോയൽസിന് ഐപിഎല്ലിൽ നിന്ന് രണ്ട് വർഷത്തെ സസ്പെൻഷനും നേരിടേണ്ടി വന്നു.
എന്നാൽ, ആരോപണങ്ങളിൽ രാജ് കുന്ദ്ര തന്റെ ഭാഗം വ്യക്തമാക്കി:
“വാതുവെപ്പ് ആരോപണം വരുന്നതിന് മുൻപ് 5–6 വർഷം ഞാൻ ടീമുമായി സജീവമായി ഉണ്ടായിരുന്നു. അന്ന് ഉടമകൾക്ക് വാതുവെപ്പ് അനുവദനീയമല്ലായിരുന്നു. പിന്നീട് ടീമിനെ രണ്ടു വർഷത്തേക്ക് വിലക്കുകയും കളിക്കാരെ ഒത്തുകളിക്ക് ശിക്ഷിക്കുകയും ചെയ്തു. ‘ലാഗി 500 കി ഷാർട്ട്? (500 രൂപയ്ക്ക് വാതുവെക്കുന്നോ?)’ എന്ന് സുഹൃത്തുക്കൾ തമ്മിൽ തമാശയായി ചോദിക്കുന്നത് പോലെയുള്ള ഒരു സംഭാഷണം മാത്രമാണ് എൻ്റെ ഭാഗത്തുനിന്നുണ്ടായത്. എന്നാൽ അതും നിയമവിരുദ്ധമാണെന്നാണ് അവർ പറഞ്ഞത്. കേസ് ഇപ്പോഴും സുപ്രീം കോടതിയുടെ പരിഗണനയിലാണ്,” – കുന്ദ്ര പറഞ്ഞു.
ഐപിഎൽ ബിസിനസ് മോഡൽ
ഐപിഎല്ലിന്റെ സാമ്പത്തിക വശങ്ങളെക്കുറിച്ചും രാജ് കുന്ദ്ര സംസാരിച്ചു. ആദ്യത്തെ അഞ്ചോ ആറോ വർഷങ്ങളിൽ ഫ്രാഞ്ചൈസികൾക്ക് ലാഭമൊന്നും ലഭിച്ചിരുന്നില്ലെന്നും പകരം കൈയിൽ നിന്ന് പണം നിക്ഷേപിക്കേണ്ടി വന്നിരുന്നുവെന്നും അദ്ദേഹം വ്യക്തമാക്കി.
എന്നാൽ ഇന്ന് ഓരോ ഫ്രാഞ്ചൈസിയും വാർഷിക ലാഭമായി മാത്രം 200 മുതൽ 500 കോടി രൂപ വരെ നേടുന്നുണ്ടെന്ന് അദ്ദേഹം പറഞ്ഞു. ഒരു ടീമിന്റെ ആകെ വരുമാനത്തിന്റെ 70 ശതമാനവും ടിവി, ഡിജിറ്റൽ സംപ്രേഷണ അവകാശങ്ങളിലൂടെയാണ് ലഭിക്കുന്നത്. ജഴ്സി സ്പോൺസർഷിപ്പുകളിലൂടെ 10–15 ശതമാനവും, ടിക്കറ്റ് വിൽപനയിലൂടെ 10–15 ശതമാനവും വരുമാനം ടീമുകൾക്ക് ലഭിക്കുന്നു.
പ്രണയവും കുടുംബജീവിതവും
2007-ൽ യുകെയിലെ ‘സെലിബ്രിറ്റി ബിഗ് ബ്രദർ’ റിയാലിറ്റി ഷോ വിജയത്തിന് ശേഷമാണ് രാജ് കുന്ദ്രയും ശിൽപ ഷെട്ടിയും കണ്ടുമുട്ടുന്നത്. ഒരു പെർഫ്യൂം ബ്രാൻഡിന്റെ പ്രൊമോഷനുമായി ബന്ധപ്പെട്ട് തുടങ്ങിയ സൗഹൃദം പിന്നീട് പ്രണയത്തിലാവുകയും 2009-ൽ ഇരുവരും വിവാഹിതരാവുകയും ചെയ്തു. വിയാൻ എന്ന മകനും സമീഷ എന്ന മകളുമാണ് ഇവർക്കുള്ളത്.
