ലോകത്തിലെ ഏറ്റവും ജനപ്രിയ വിനോദസഞ്ചാര കേന്ദ്രങ്ങളിലൊന്നായ സ്പെയിനിലേക്ക് യാത്ര തിരിക്കുന്നവർ സൂക്ഷിക്കുക! വിനോദസഞ്ചാരികളുടെ ഒഴുക്ക് നിയന്ത്രണാതീതമായതോടെ പൊതുസ്ഥലങ്ങളിലെ അച്ചടക്കലംഘനങ്ങൾ തടയാൻ കർശന നിയമങ്ങളുമായി രംഗത്തെത്തിയിരിക്കുകയാണ് പ്രാദേശിക ഭരണകൂടങ്ങൾ. ചെറിയൊരു അശ്രദ്ധ പോലും ലക്ഷക്കണക്കിന് രൂപയുടെ പിഴയിലേക്ക് നയിച്ചേക്കാം.
ബാഴ്സലോണ, മല്ലോർക്ക, ഇബിസ, ബെനിഡോം തുടങ്ങിയ പ്രമുഖ വിനോദസഞ്ചാര കേന്ദ്രങ്ങളിലാണ് പ്രാദേശിക ചട്ടങ്ങൾ വളരെ കർശനമായി നടപ്പാക്കുന്നത്. യാത്രയ്ക്ക് മുൻപ് സഞ്ചാരികൾ നിർബന്ധമായും അറിഞ്ഞിരിക്കേണ്ട 10 കാര്യങ്ങൾ ഇതാ:
1. തെരുവിൽ മദ്യപിച്ചാൽ പിടിവീഴും
പൊതുസ്ഥലങ്ങളിലും തെരുവുകളിലും മദ്യപിക്കുന്നത് സ്പെയിനിലെ ഭൂരിഭാഗം മേഖലകളിലും നിരോധിച്ചിട്ടുണ്ട്. പ്രത്യേകിച്ച് ബാലിയാറിക് ദ്വീപുകൾ പോലുള്ള ടൂറിസ്റ്റ് കേന്ദ്രങ്ങളിൽ നിയമം ലംഘിച്ചാൽ മിന്നൽ പരിശോധനയിലൂടെ സ്ഥലത്തുവെച്ചുതന്നെ വൻ തുക പിഴ ഈടാക്കും.
2. ബീച്ചിൽ പുകവലിക്ക് വിലക്ക്
കടൽത്തീരങ്ങളിൽ പുകവലിക്കുന്നതിനും സിഗരറ്റ് കുറ്റികളും മറ്റ് അവശിഷ്ടങ്ങളും വലിച്ചെറിയുന്നതിനും നിരോധനമുണ്ട്. ബീച്ചുകൾ ഉൾപ്പെടെയുള്ള കൂടുതൽ തുറസ്സായ സ്ഥലങ്ങളിലേക്ക് പുകവലി നിരോധനം വ്യാപിപ്പിക്കാൻ സ്പെയിൻ സർക്കാർ ഒരുങ്ങുകയാണ്.
3. ബീച്ച് ഷവറിൽ സോപ്പ് ഉപയോഗിക്കരുത്
കടൽത്തീരങ്ങളിൽ സ്ഥാപിച്ചിട്ടുള്ള പൊതു ഷവറുകളിൽ സോപ്പ്, ഷാംപൂ എന്നിവ ഉപയോഗിക്കുന്നത് നിയമവിരുദ്ധമാണ്. കടൽവെള്ളവും തീരവും മലിനമാകുന്നത് തടയാനാണ് ഈ നടപടി.
4. ബീച്ചിൽ ‘സ്ഥലം പിടിത്തം’ വേണ്ട
അനുമതിയില്ലാതെ കുടകളും കസേരകളും വച്ച് ബീച്ചുകളിലെ വലിയ ഭാഗങ്ങൾ മുൻകൂട്ടി ‘റിസർവ്’ ചെയ്യുന്ന രീതി ചില നഗരങ്ങളിൽ കുറ്റകരമാണ്. ഇത് കണ്ടെത്തിയാൽ വസ്തുക്കൾ കണ്ടുകെട്ടുകയും പിഴ ചുമത്തുകയും ചെയ്യും.
5. സ്വിംവെയറിൽ നഗരത്തിലൂടെ നടന്നാൽ പണി കിട്ടും
ബീച്ചിന് പുറത്തുള്ള നഗരവീഥികളിലൂടെയും കടമ്പോളങ്ങളിലൂടെയും നീന്തൽവസ്ത്രങ്ങൾ (Swimsuit) മാത്രം ധരിച്ച് നടക്കാൻ അനുവാദമില്ല. നഗരത്തിന്റെ പൊതു സംസ്കാരം സംരക്ഷിക്കുന്നതിന്റെ ഭാഗമായാണ് ഈ നിരോധനം.
6. രാത്രിയിലെ ബഹളം ഒഴിവാക്കാം
ഹോട്ടലുകളിലും താമസസ്ഥലങ്ങളിലും രാത്രി സമയങ്ങളിൽ അമിത ശബ്ദമുണ്ടാക്കുന്നവർക്കെതിരെ കർശന നടപടിയുണ്ടാകും. ടൂറിസ്റ്റ് മേഖലകളിലെ നിശബ്ദതാ നിയമങ്ങൾ ലംഘിച്ചാൽ വലിയ തുക പിഴ ഒടുക്കേണ്ടി വരും.
7. പൊതുമുതൽ നശിപ്പിച്ചാൽ ജയിൽ വരെ
പൊതുസൗകര്യങ്ങൾ നശിപ്പിക്കുക, ചുമരുകളിൽ ഗ്രാഫിറ്റികൾ വരയ്ക്കുക തുടങ്ങിയവ ഗുരുതരമായ കുറ്റകൃത്യമായാണ് സ്പെയിൻ കണക്കാക്കുന്നത്.
8. ലഹരി വസ്തുക്കളുടെ കാര്യത്തിൽ ‘സീറോ ടോളറൻസ്’
അനധികൃത ലഹരിവസ്തുക്കൾ കൈവശം വയ്ക്കുന്നതും ഉപയോഗിക്കുന്നതും വൻ നിയമനടപടികൾക്ക് വഴിതുറക്കും. പൊതുസ്ഥലങ്ങളിൽ ലഹരി ഉപയോഗിച്ച് പിടിയിലായാൽ യാത്രാനുമതി വരെ റദ്ദാക്കപ്പെട്ടേക്കാം.
9. നഗരങ്ങൾ മാറുന്നതിനനുസരിച്ച് നിയമവും മാറും
സ്പെയിനിലെ ഓരോ സ്വയംഭരണ പ്രദേശത്തിനും വ്യത്യസ്ത നിയമങ്ങളാണുള്ളത്. ബാഴ്സലോണയിലെ നിയമങ്ങളാകില്ല മാഡ്രിഡിൽ. അതിനാൽ സന്ദർശിക്കുന്ന സ്ഥലത്തെ പ്രാദേശിക നിർദേശങ്ങൾ മുൻകൂട്ടി വായിച്ചു മനസ്സിലാക്കുക.
10. സംസ്കാരത്തെ മാനിക്കാം, യാത്ര ആസ്വദിക്കാം
പ്രാദേശിക സംസ്കാരത്തെയും നിയമങ്ങളെയും ബഹുമാനിക്കുക എന്നതാണ് സന്തോഷകരമായ സ്പെയിൻ യാത്രയുടെ ആണിക്കല്ല്. നിയമങ്ങൾ കൃത്യമായി പാലിച്ചാൽ തടസ്സങ്ങളൊന്നുമില്ലാതെ സ്പെയിനിന്റെ മനോഹാരിത പൂർണ്ണമായും ആസ്വദിക്കാം.
