ഹൈദരാബാദ്: ഇന്ത്യന് സിനിമാലോകം ഏറെ പ്രതീക്ഷയോടെ കാത്തിരിക്കുന്ന എസ്.എസ്. രാജമൗലി – മഹേഷ് ബാബു കൂട്ടുകെട്ടിലെ ബ്രഹ്മാണ്ഡ ചിത്രം ‘വാരണാസി’യുടെ ചിത്രീകരണം അന്തിമ ഘട്ടത്തിലേക്ക്. പൂര്ണ്ണമായും ഐമാക്സ് (IMAX) സാങ്കേതികവിദ്യയില് ചിത്രീകരിക്കുന്ന ആദ്യ ഇംഗ്ലീഷ് ഇതര ചിത്രമെന്ന ചരിത്രനേട്ടവുമായാണ് ചിത്രം ഒരുങ്ങുന്നത്. ഒരു പ്രമുഖ യൂറോപ്യന് മാഗസിന് നല്കിയ അഭിമുഖത്തിലാണ് സംവിധായകന് രാജമൗലി ചിത്രത്തിന്റെ സുപ്രധാന വിശേഷങ്ങള് പങ്കുവെച്ചത്.
ചിത്രത്തിന്റെ 80 ശതമാനത്തോളം ഭാഗങ്ങളുടെ ഷൂട്ടിംഗ് ഇതിനകം പൂര്ത്തിയായിട്ടുണ്ട്. ബിഗ് സ്കെയിൽ ഐമാക്സ് ആക്ഷന് രംഗങ്ങളെല്ലാം ചിത്രീകരിച്ചു കഴിഞ്ഞതായും നിലവില് താരതമ്യേന ചെറിയ രംഗങ്ങള് മാത്രമാണ് അവശേഷിക്കുന്നതെന്നും രാജമൗലി വ്യക്തമാക്കി. ബാക്കിയുള്ള 20 ശതമാനം ഭാഗങ്ങളുടെ ചിത്രീകരണം ഹൈദരാബാദില് പുരോഗമിക്കുകയാണ്. ദസറയ്ക്ക് മുന്പ് ഷൂട്ടിംഗ് പൂര്ത്തീകരിക്കാനാണ് അണിയറപ്രവര്ത്തകര് ലക്ഷ്യമിടുന്നത്.
നിശ്ചിത സമയത്തിനകം പണി പൂര്ത്തിയാക്കുന്നതിന്റെ ഭാഗമായി ചിത്രീകരണത്തോടൊപ്പം തന്നെ പോസ്റ്റ് പ്രൊഡക്ഷന് ജോലികളും സമാന്തരമായി നടക്കുന്നുണ്ട്. ചിത്രീകരണം പൂര്ത്തിയാകുന്ന ഓരോ രംഗവും അപ്പോള്ത്തന്നെ എഡിറ്റ് ചെയ്ത് വിഷ്വല് എഫക്റ്റ്സ് (VFX) ടീമിന് അയച്ചുകൊടുക്കുന്ന രീതിയാണ് അവലംബിക്കുന്നത്.
ശ്രീ ദുര്ഗ ആര്ട്സിന്റെ ബാനറില് നിര്മ്മിക്കുന്ന ചിത്രത്തില് പ്രിയങ്ക ചോപ്രയാണ് നായിക. നീണ്ട ഇടവേളയ്ക്ക് ശേഷമുള്ള താരത്തിന്റെ ഇന്ത്യന് ബിഗ് സ്ക്രീനിലേക്കുള്ള തിരിച്ചുവരവ് കൂടിയാണിത്. മലയാളത്തിന്റെ പ്രിയതാരം പൃഥ്വിരാജ് സുകുമാരനാണ് ചിത്രത്തില് പ്രതിനായക വേഷത്തിലെത്തുന്നത്. ഓസ്കര് ജേതാവ് എം.എം. കീരവാണിയാണ് ചിത്രത്തിന് സംഗീതം പകരുന്നത്.
കാലഘട്ടങ്ങളും സഞ്ചാരവും
512 സി.ഇ (CE) മുതല് 2071 വരെയുള്ള ദീര്ഘമായ കാലഘട്ടമാണ് ചിത്രത്തിന്റെ പശ്ചാത്തലം. വാരണാസി നഗരത്തിന്റെ കഥ പറയുന്ന ചിത്രത്തില്, നഗരത്തിന്റെ ഭാവിയെ ലക്ഷ്യമാക്കി എത്തുന്ന ഭീമന് ഛിന്നഗ്രഹവും അതിനെ തുടര്ന്നുണ്ടാകുന്ന സംഭവവികാസങ്ങളുമാണ് പ്രധാന പ്രമേയം. വാരണാസിയില് നിന്ന് ആരംഭിച്ച് അന്റാര്ട്ടിക്ക, ആഫ്രിക്ക, പുരാതന റോം എന്നിവിടങ്ങളിലൂടെ സഞ്ചരിച്ച് വീണ്ടും വാരണാസിയില് തന്നെ എത്തിച്ചേരുന്ന സാഹസിക കഥയാണ് ചിത്രം പറയുന്നത്.
ചിത്രത്തില് ശിവഭക്തനായ ‘രുദ്ര’ എന്ന നായക കഥാപാത്രത്തെയാണ് മഹേഷ് ബാബു അവതരിപ്പിക്കുന്നത്. ഇതിനുപുറമെ, പ്രത്യേകമായൊരു സീക്വന്സില് ശ്രീരാമനായും താരം സ്ക്രീനിലെത്തുന്നുണ്ട്.
