തിരുവനന്തപുരം: ദുരന്തമുഖത്ത് വിരുന്നുണ്ണുകയും ഹെലികോപ്റ്ററില് പറക്കുകയും ചെയ്തുവെന്ന വിമര്ശനങ്ങള്ക്ക് രൂക്ഷമായ മറുപടിയുമായി മുഖ്യമന്ത്രി വി.ഡി. സതീശന് രംഗത്ത്. താന് കഴിച്ചത് ആര്ഭാട വിരുന്നല്ലെന്നും മലബാര് ശൈലിയിലുള്ള സാധാരണ ഉച്ചഭക്ഷണം മാത്രമാണെന്നും വ്യക്തമാക്കിയ അദ്ദേഹം, കഴിഞ്ഞ പ്രളയകാലത്ത് അന്നത്തെ മുഖ്യമന്ത്രി പിണറായി വിജയന് നിരാഹാര സമരത്തിലായിരുന്നെന്ന് തനിക്കറിയില്ലായിരുന്നുവെന്ന് പരിഹസിച്ചു. സ്വകാര്യ ആവശ്യത്തിനല്ല, തമിഴ്നാട്ടിലേക്ക് പോകേണ്ടിയിരുന്ന ഒരു നിക്ഷേപക ഗ്രൂപ്പിനെ കേരളത്തില് നിലനിര്ത്താന് സമയബന്ധിതമായി നടത്തിയ ഔദ്യോഗിക യാത്ര മാത്രമാണ് ഹെലികോപ്റ്ററിലെന്നും, മുന്കാലങ്ങളില് പിണറായി വിജയന് പാര്ട്ടി ആവശ്യങ്ങള്ക്ക് പോലും ഹെലികോപ്റ്റര് ഉപയോഗിച്ചതിന്റെ കണക്കുകള് തന്റെ കൈയിലുണ്ടെന്നും അദ്ദേഹം വാര്ത്താസമ്മേളനത്തില് ഓര്മ്മിപ്പിച്ചു. നിക്ഷേപകരുടെ വിവരം വെളിപ്പെടുത്താന് തയ്യാറാകാത്ത മുഖ്യമന്ത്രി, പി.എം. ശ്രീ കരാറില് നിന്ന് ഇനി പിന്നോട്ടില്ലെന്നും പത്തനംതിട്ടൊഴികെയുള്ള ജില്ലകളില് പ്രളയക്കെടുതികള് നിയന്ത്രണവിധേയമാണെന്നും കൂട്ടിച്ചേര്ത്തു.
