കനാലിൽ കൈകൾ കെട്ടിയ നിലയിൽ വിവാഹിതയുടെയും യുവാവിന്റെയും മൃതദേഹങ്ങൾ കണ്ടെത്തി; കൊലപാതകമെന്ന് സംശയം, അന്വേഷണം ഊർജ്ജിതം

ഫരീദാബാദ്: ഹരിയാനയിലെ ഫരീദാബാദിൽ യുവതിയുടെയും യുവാവിന്റെയും നിഗൂഢ മരണങ്ങളിൽ ഞെട്ടിക്കുന്ന വഴിത്തിരിവ്. ആഗ്ര കനാലിൽ ചാടി ഇരുവരും ആത്മഹത്യ ചെയ്തുവെന്ന് കരുതിയ സംഭവം ആസൂത്രിതമായ കൊലപാതകമാണെന്ന സംശയത്തിലേക്ക് വിരൽ ചൂണ്ടുന്ന തെളിവുകളാണ് ഇപ്പോൾ പോലീസിന് ലഭിച്ചിരിക്കുന്നത്.

ആകാശ് (23), രശ്മി (27) എന്നിവരുടെ മൃതദേഹങ്ങളാണ് ഷാപൂർ കലന് സമീപമുള്ള കനാലിൽ നിന്ന് കണ്ടെടുത്തത്. ശനിയാഴ്ച വൈകുന്നേരം ബിപിടിപി പാലത്തിന് സമീപം ഇരുവരും കനാലിൽ ചാടിയെന്ന വിവരത്തെ തുടർന്ന് നടത്തിയ തെരച്ചിലിലാണ് ഞായറാഴ്ചയോടെ മൃതദേഹങ്ങൾ പുറത്തെടുത്തത്.

നിഗൂഢത കൂട്ടി ചോരപുരണ്ട ചുറ്റികയും കേബിളുകളും

കണ്ടെടുത്ത രണ്ട് മൃതദേഹങ്ങളുടെയും കൈകൾ ഡാറ്റാ കേബിളുകൾ ഉപയോഗിച്ച് കൂട്ടിക്കെട്ടിയ നിലയിലായിരുന്നു. ഇരുവരുടെയും മുഖത്ത് ഗുരുതരമായ പരിക്കുകളുമുണ്ട്. ഇതിനുപുറമെ, കനാലിന് സമീപം ഉപേക്ഷിക്കപ്പെട്ട നിലയിൽ കണ്ടെത്തിയ രശ്മിയുടെ കാറിനുള്ളിൽ നിന്ന് രണ്ട് മൊബൈൽ ഫോണുകളും ചോരപുരണ്ട ഒരു ചുറ്റികയും പോലീസ് കണ്ടെടുത്തു. ഇവർ വെള്ളത്തിൽ വീണു മരിച്ചതാണോ അതോ ചുറ്റിക കൊണ്ടുള്ള അടിയേറ്റാണോ മരിച്ചതെന്ന കാര്യത്തിൽ വ്യക്തത വരാനുണ്ട്.

കഥ മാറ്റിയ ഭർത്താവിന്റെ പരാതി

ശനിയാഴ്ച രശ്മിയുടെ ഭർത്താവായ ശിവം കുമാർ പോലീസിൽ നൽകിയ പരാതിയോടെയാണ് സംഭവങ്ങളുടെ തുടക്കം. ആകാശ് തന്റെ ഭാര്യയെ നിരന്തരം ശല്യം ചെയ്യുന്നു എന്നായിരുന്നു പരാതി. മുൻപ് താക്കീത് ചെയ്തപ്പോൾ ആകാശ് മാപ്പ് പറഞ്ഞിരുന്നെങ്കിലും ശല്യം തുടർന്നതായും, ശനിയാഴ്ച ഉച്ചയ്ക്ക് രണ്ട് മണിയോടെ ആകാശിനെ കാണാനായി രശ്മി സ്വന്തം കാറിൽ വീട്ടിൽ നിന്ന് ഇറങ്ങിയതായും ഭർത്താവ് പറയുന്നു. ഇതിനുപിന്നാലെയാണ് വൈകുന്നേരം നാലരയോടെ ഇരുവരും കനാലിൽ ചാടിയെന്ന വിവരം പോലീസിന് ലഭിക്കുന്നത്.

ഹണി ട്രാപ്പെന്ന് കുടുംബം; അന്വേഷണം ഊർജ്ജിതം

എന്നാൽ ഇത് ആത്മഹത്യയല്ലെന്നും വലിയൊരു ഗൂഢാലോചനയിലൂടെ ആകാശിനെ വിളിച്ചുവരുത്തി കൊലപ്പെടുത്തിയതാണെന്നും കുടുംബം ആരോപിക്കുന്നു.

“ആകാശിനെ ചതിയിലൂടെ വിളിച്ചുവരുത്തി യുവതിയോടൊപ്പം കൊലപ്പെടുത്തുകയായിരുന്നു” – ആകാശിന്റെ സഹോദരീഭർത്താവ് അജയ് നാഗർ ആരോപിച്ചു.

ഫോറൻസിക് പരിശോധനയുടെയും പോസ്റ്റ്‌മോർട്ടം റിപ്പോർട്ടിന്റെയും അടിസ്ഥാനത്തിൽ മാത്രമേ യഥാർത്ഥ മരണകാരണം വ്യക്തമാവുകയുള്ളൂവെന്ന് പോലീസ് അറിയിച്ചു. ഭാരതീയ ന്യായ സംഹിതയിലെ ബന്ധപ്പെട്ട വകുപ്പുകൾ പ്രകാരം കേസെടുത്ത് പോലീസ് അന്വേഷണം ശക്തമാക്കിയിട്ടുണ്ട്.