കൊച്ചി: മലയാളികളുടെ പ്രിയതാരം മോഹൻലാലിന്റെ മകൾ വിസ്മയ മോഹൻലാൽ വെള്ളിത്തിരയിലേക്ക് അരങ്ങേറുന്ന ‘തുടക്കം’ സിനിമയുടെ റിലീസിന് ഇനി ഏഴ് ദിവസങ്ങൾ മാത്രം. ഓഗസ്റ്റ് 7-ന് തിയറ്ററുകളിലെത്തുന്ന ചിത്രത്തിന്റെ പുതിയ പോസ്റ്റർ മോഹൻലാൽ സോഷ്യൽ മീഡിയയിലൂടെ പുറത്തുവിട്ടു.
ഒരു കുട്ടിക്കും വളർത്തുനായയ്ക്കുമൊപ്പമുള്ള വിസ്മയയുടെ ചിത്രമാണ് പുതിയ പോസ്റ്ററിൽ ഉൾപ്പെടുത്തിയിരിക്കുന്നത്. വിസ്മയയ്ക്ക് പുറമേ പ്രമുഖ നിർമാതാവ് ആന്റണി പെരുമ്പാവൂരിന്റെ മകൻ ആശിഷ് ജോ ആന്റണിയും ചിത്രത്തിൽ പ്രധാന വേഷത്തിൽ എത്തുന്നുണ്ട്. മോഹൻലാലിന്റെ അതിഥി വേഷവും ചിത്രത്തിന്റെ പ്രധാന ആകർഷണമാണ്.
സെൻസറിങ് പൂർത്തിയാക്കിയ ചിത്രത്തിന് യു/എ 16 പ്ലസ് (U/A 16+) സർട്ടിഫിക്കറ്റാണ് ലഭിച്ചിരിക്കുന്നത്. 2 മണിക്കൂറും 19 മിനിറ്റുമാണ് (139.35 മിനിറ്റ്) സിനിമയുടെ ദൈർഘ്യം.
ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമിക്കുന്ന ‘തുടക്കം’ സംവിധാനം ചെയ്യുന്നത് ജൂഡ് ആന്റണി ജോസഫാണ്. ‘2018’ എന്ന ഇൻഡസ്ട്രി ഹിറ്റിന് ശേഷം ജൂഡ് ആന്റണിയുടേതായി പുറത്തുവരുന്ന ചിത്രമെന്ന നിലയിൽ വലിയ പ്രതീക്ഷയോടെയാണ് സിനിമാലോകം ഈ ചിത്രത്തെ നോക്കിക്കാണുന്നത്. ഒരു കൊച്ചു കുടുംബചിത്രമാണ് ‘തുടക്കം’ എന്ന് സംവിധായകൻ നേരത്തെ വ്യക്തമാക്കിയിരുന്നു.
