ശ്രീലങ്കൻ സ്പിൻ കെണി മറിയ്ക്കാൻ പരിശീലനം ശക്തമാക്കിയിരിക്കുന്ന ഇന്ത്യൻ ടീമിന് പിന്തുണയുമായി നാല് യുവ സ്പിന്നർമാർ കൂടി കൊളംബോയിലെത്തി. ലങ്കൻ പിച്ചുകളിലെ വെല്ലുവിളികൾ ഫലപ്രദമായി നേരിടാൻ ഇന്ത്യൻ ബാറ്റർമാരെ സജ്ജമാക്കുകയെന്ന ലക്ഷ്യത്തോടെയാണ് ബിസിസിഐ ഹർഷ് ദുബെ, തനുഷ് കോടിയാൻ, വിപ്രജ് നിഗം, ശിവംഗ് കുമാർ എന്നീ യുവതാരങ്ങളെ നെറ്റ് ബൗളർമാരായി ടീമിനൊപ്പം ചേർത്തത്. ശുബ്മാൻ ഗിൽ നയിക്കുന്ന സംഘം കൊളംബോ നോൺഡെസ്ക്രിപ്റ്റ്സ് ക്രിക്കറ്റ് ക്ലബ് ഗ്രൗണ്ടിലാണ് ഇപ്പോൾ പരിശീലനം നടത്തുന്നത്. വിദർഭയിൽ നിന്നുള്ള ഇടങ്കയ്യൻ സ്പിൻ ഓൾറൗണ്ടർ ഹർഷ് ദുബെ, മുംബൈയുടെ ഓഫ് സ്പിൻ ഓൾറൗണ്ടർ തനുഷ് കോടിയാൻ, ഡൽഹിയുടെ ലെഗ് സ്പിൻ ഓൾറൗണ്ടർ വിപ്രജ് നിഗം, മധ്യപ്രദേശിൽ നിന്നുള്ള ചൈനാമാൻ ബൗളർ ശിവംഗ് കുമാർ എന്നിവരടങ്ങുന്ന യുവനിരയാണ് ലങ്കൻ പര്യടനത്തിൽ ഇന്ത്യയുടെ പരിശീലനത്തിന് കരുത്തുപകരുന്നത്. ഓഗസ്റ്റ് 7 മുതൽ 9 വരെ നടക്കുന്ന മൂന്ന് ദിവസത്തെ പരിശീലന മത്സരത്തിന് ശേഷം ടീം ആദ്യ ടെസ്റ്റിനായി ഗാലെയിലേക്ക് തിരിക്കും. ഓഗസ്റ്റ് 15 മുതൽ 19 വരെ ഗാലെ അന്താരാഷ്ട്ര സ്റ്റേഡിയത്തിലാണ് പരമ്പരയിലെ ആദ്യ ടെസ്റ്റ് നടക്കുന്നത്. രണ്ടാം ടെസ്റ്റ് ഓഗസ്റ്റ് 23 മുതൽ 27 വരെ കൊളംബോ എസ്.എസ്.സി ഗ്രൗണ്ടിലും അരങ്ങേറും.
