ഹോർമൂസിൽ വീണ്ടും കപ്പലുകൾക്ക് നേരെ ആക്രമണം; സൗദിയിൽ മിസൈൽ അവശിഷ്ടം വീണ് പ്രവാസിക്ക് പരിക്ക്

റിയാദ്/മസ്‌കത്ത്: ഹോർമൂസ് കടലിടുക്കിൽ വീണ്ടും കപ്പലുകൾക്ക് നേരെ ആക്രമണം. ആക്രമണത്തിനിരയായ കുവൈത്ത് പതാക ഘടിപ്പിച്ച എണ്ണക്കപ്പലിൽ നിന്ന് അഞ്ച് മലയാളി/ഇന്ത്യൻ ജീവനക്കാരെ രക്ഷപ്പെടുത്തി. അതേസമയം, സൗദി അറേബ്യയിലെ വിവിധ മേഖലകളിൽ ഹൂതികൾ നടത്തിയ ആക്രമണത്തിൽ മിസൈൽ അവശിഷ്ടങ്ങൾ പതിച്ച് പ്രവാസിക്ക് പരിക്കേറ്റു.

ഒമാൻ തീരത്തോട് ചേർന്നാണ് കപ്പലുകൾക്ക് നേരെ ആക്രമണമുണ്ടായത്. തുറമുഖത്ത് നങ്കൂരമിട്ടിരുന്ന കപ്പലിന് നേരെ നടന്ന ആക്രമണത്തിൽ തീപിടിത്തമുണ്ടായെങ്കിലും ജീവനക്കാരെല്ലാം സുരക്ഷിതരാണ്. ഹോർമൂസ് കടലിടുക്കിൽ നിന്ന് പുറത്തുകടക്കാൻ ശ്രമിക്കുന്നതിനിടെയാണ് രണ്ടാമത്തെ എണ്ണക്കപ്പലിന് നേരെ ആക്രമണമുണ്ടായത്.

കുവൈത്തിന്റെ 'ഖമീസ് 3' എന്ന കപ്പലിൽ കുടുങ്ങിയ അഞ്ച് ഇന്ത്യൻ ജീവനക്കാരെയും രക്ഷപ്പെടുത്തിയതായി ഒമാനിലെ ഇന്ത്യൻ എംബസി സ്ഥിരീകരിച്ചു. ഇവരെല്ലാവരും സുരക്ഷിതരാണെന്ന് അധികൃതർ അറിയിച്ചു.

സൗദിയിൽ ആക്രമണം ശക്തം

അതേസമയം, സൗദി അറേബ്യയിലെ നജ്റാൻ, അസീർ പ്രവിശ്യകളിൽ ഹൂതികൾ ഡ്രോൺ-മിസൈൽ ആക്രമണം ശക്തമാക്കി. അസീറിൽ പള്ളിക്ക് മുകളിലേക്ക് ബാലിസ്റ്റിക് മിസൈലിന്റെ അവശിഷ്ടങ്ങൾ പതിച്ചാണ് ഏഷ്യക്കാരനായ പ്രവാസിക്ക് പരിക്കേറ്റത്. സംഭവത്തിൽ സമീപത്തെ കെട്ടിടങ്ങൾക്കും വാഹനങ്ങൾക്കും നാശനഷ്ടം സംഭവിച്ചിട്ടുണ്ട്.

നജ്റാൻ പ്രവിശ്യയിൽ പ്രാദേശിക സ്കൂളിന് മുകളിലാണ് ഡ്രോൺ അവശിഷ്ടങ്ങൾ പതിച്ചത്. സ്കൂൾ കെട്ടിടത്തിന് കാര്യമായ കേടുപാടുകൾ സംഭവിച്ചെങ്കിലും ആളപായമില്ല. മേഖലയിൽ സുരക്ഷ ശക്തമാക്കിയതായി സൗദി അധികൃതർ വ്യക്തമാക്കി.