പ്രതിഷേധച്ചൂടിൽ ദില്ലി: ഗ്യാനേഷ് കുമാറിന് വൻ സുരക്ഷയൊരുക്കി കേന്ദ്രം, നഗരത്തിൽ 11,000 അധിക കേന്ദ്രസേനാംഗങ്ങൾ, ജന്തർ മന്തറിൽ നടപടികൾ
Nazeema
സ്റ്റാഫ് റിപ്പോർട്ടർ
ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിപക്ഷ പ്രതിഷേധത്തെ തുടർന്ന് ദില്ലിയിൽ 26,000 കേന്ദ്രസേനാംഗങ്ങളെ വിന്യസിച്ചു. മുഖ്യതെരഞ്ഞെടുപ്പ് കമ്മീഷണറുടെ ഇസഡ് പ്ലസ് സുരക്ഷ ശക്തമാക്കിയ പോലീസ്, ജന്തർ മന്തറിന് സമീപത്തെ സ്റ്റേഡിയങ്ങൾ താത്കാലിക കസ്റ്റഡി കേന്ദ്രങ്ങളാക്കി മാറ്റി.
ദില്ലി: മുഖ്യതെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിപക്ഷ പ്രതിഷേധം തലസ്ഥാന നഗരിയെ ചൂടുപിടിപ്പിക്കുന്നു. ക്രമസമാധാന നില ഉറപ്പാക്കാൻ കേന്ദ്ര ആഭ്യന്തര മന്ത്രാലയം 11,000 അധിക കേന്ദ്രസേനാംഗങ്ങളെക്കൂടി ദില്ലിയിലേക്ക് നിയോഗിച്ചു. ഇതോടെ നഗരത്തിൽ വിന്യസിച്ച ആകെ സി.എ.പി.എഫ് (CAPF) അംഗങ്ങളുടെ എണ്ണം 26,000 ആയി ഉയർന്നു.
ഈ മാസം 12 വരെ 110 സി.എ.പി.എഫ് കമ്പനികൾക്കാണ് കേന്ദ്രം അനുമതി നൽകിയിട്ടുള്ളത്. പ്രതിഷേധത്തിൽ വനിതകളുടെ പങ്കാളിത്തം കൂടുതലായതിനാൽ അഞ്ച് വനിതാ സി.എ.പി.എഫ് കമ്പനികളെയും പ്രത്യേകമായി സുരക്ഷയ്ക്കായി നിയോഗിച്ചിട്ടുണ്ട്.
ജന്തർ മന്തറിൽ സുരക്ഷ ശക്തമാക്കി; സ്റ്റേഡിയങ്ങൾ താത്കാലിക കസ്റ്റഡി കേന്ദ്രങ്ങൾ
പ്രതിപക്ഷം ജന്തർ മന്തറിൽ സമരം പ്രഖ്യാപിച്ച സാഹചര്യത്തിൽ ദില്ലി പോലീസ് നടപടികൾ കടുപ്പിച്ചു. നഗരത്തിലെ പ്രമുഖ സ്റ്റേഡിയങ്ങൾ താത്കാലിക കസ്റ്റഡി കേന്ദ്രങ്ങളാക്കി മാറ്റാനുള്ള നടപടികൾ ആരംഭിച്ചിട്ടുണ്ട്. ഹരിയാന, ഉത്തർപ്രദേശ് അതിർത്തികളിൽ ബാരിക്കേഡുകൾ ഉയർത്തി പോലീസ് പരിശോധന കർശനമാക്കി.
പ്രതിഷേധക്കാരെ എത്തിക്കുന്ന ബസുകളുടെ ബുക്കിംഗും സഞ്ചാരപാതകളും പോലീസ് കടുത്ത നിരീക്ഷണത്തിലാണ്. മെട്രോ സർവീസുകൾക്കും ഗതാഗത നിയന്ത്രണം ഏർപ്പെടുത്തും.
ഗ്യാനേഷ് കുമാറിന് ഇസഡ് പ്ലസ് സുരക്ഷ
പ്രതിഷേധം ശക്തമാകുന്ന സാഹചര്യത്തിൽ കേന്ദ്ര ആഭ്യന്തരമന്ത്രാലയം മുഖ്യതെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ സുരക്ഷ പുനഃപരിശോധിച്ചു. നിലവിലുള്ള ഇസഡ് പ്ലസ് (Z+) സുരക്ഷ സംവിധാനം കൂടുതൽ ശക്തമാക്കിയിട്ടുണ്ട്.
ഗ്യാനേഷ് കുമാറിന്റെ ദില്ലിയിലെയും ആഗ്രയിലെയും വസതികളിലും തെരഞ്ഞെടുപ്പ് കമ്മീഷൻ ആസ്ഥാനത്തും അധിക അർധസൈനിക വിഭാഗത്തെ വിന്യസിച്ചു. ഏതൊരു അടിയന്തര സാഹചര്യവും നേരിടാൻ സജ്ജമായിരിക്കാൻ പോലീസ് സേനയ്ക്ക് നിർദേശം നൽകിയിട്ടുണ്ട്.
