ദൃശ്യം 3 ഹിന്ദി ഓപ്പണിംഗില്‍ എത്ര നേടി?, കണക്കുകള്‍ പുറത്ത്

മുംബൈ: ബോളിവുഡ് സിനിമാസ്വാദകർ ഒന്നടങ്കം കാത്തിരുന്ന അജയ് ദേവ്ഗൺ ചിത്രം 'ദൃശ്യം 3'ക്ക് (ദൃശ്യം ​ദ കൺക്ലൂഷൻ) തിയേറ്ററുകളിൽ വമ്പൻ മുന്നേറ്റം. റിലീസ് ചെയ്ത ആദ്യ ദിനം തന്നെ ആഗോളതലത്തിൽ ചിത്രം 95.10 കോടി രൂപ സ്വന്തമാക്കിയതായാണ് പുറത്തുവരുന്ന കണക്കുകൾ സൂചിപ്പിക്കുന്നത്.

മോഹൻലാൽ കേന്ദ്രകഥാപാത്രമായെത്തിയ മലയാളം ദൃശ്യം 3 പുറത്തിറങ്ങി നാലു മാസങ്ങൾക്ക് ശേഷമാണ് ഹിന്ദി പതിപ്പ് തിയേറ്ററുകളിലെത്തിയത്. അഭിനയത്തിലും നിർമാണത്തിലും പുലർത്തിയ മികവ് പ്രേക്ഷകരിൽ വലിയ തൃപ്തി സൃഷ്ടിച്ചിട്ടുണ്ടെന്നാണ് ആദ്യ പ്രതികരണങ്ങൾ വ്യക്തമാക്കുന്നത്. സിനിമയ്ക്ക് നൽകിയിരിക്കുന്ന മികച്ച ക്ലൈമാക്സും ചിത്രത്തിന്റെ തിളക്കം കൂട്ടുന്നു.

പ്രമുഖ ചലച്ചിത്ര നിരൂപകൻ തരൺ ആദർശ് ചിത്രത്തിന് 4.5/5 റേറ്റിംഗ് നൽകുകയും "ഷുവർ-ഷോട്ട് ബ്ലോക്ക്ബസ്റ്റർ" എന്ന് വിശേഷിപ്പിക്കുകയും ചെയ്തു. മലയാളം ഒറിജിനലിൽ നിന്ന് തിരക്കഥയിൽ മാറ്റങ്ങൾ വരുത്തിയാണ് ഹിന്ദി പതിപ്പ് ഒരുക്കിയിരിക്കുന്നത്. ഹിന്ദി പ്രേക്ഷകരുടെ അഭിരുചി കണക്കിലെടുത്ത് മാറ്റങ്ങൾ വരുത്തിയിട്ടുണ്ടെന്ന് സംവിധായകൻ ജീത്തു ജോസഫ് നേരത്തെ വ്യക്തമാക്കിയിരുന്നു.

അഭിഷേക് പഥക് സംവിധാനം ചെയ്ത ചിത്രത്തിൽ അജയ് ദേവ്ഗണ് പുറമെ തബു, ജയ്ദീപ് അഹ്ലാവത്, ശ്രിയ ശരൺ എന്നിവരും പ്രധാന വേഷങ്ങളിലെത്തുന്നു. ജയ്ദീപ് അഹ്ലാവതിന്റെ പ്രകടനത്തിനും മികച്ച പശ്ചാത്തല സംഗീതത്തിനും പ്രേക്ഷകരിൽ നിന്ന് വൻ പ്രശംസയാണ് ലഭിക്കുന്നത്.