നിവിൻ പോളിയുടെ 'യേഴു കടൽ യേഴു മലൈ' ഒക്ടോബർ 1ന് തിയറ്ററുകളിൽ

കൊച്ചി: റാം സംവിധാനം ചെയ്ത് നിവിൻ പോളി നായകനാകുന്ന തമിഴ് റൊമാന്റിക് സൈക്കോളജിക്കൽ ത്രില്ലർ ചിത്രം 'യേഴു കടൽ യേഴു മലൈ' ഒക്ടോബർ ഒന്നിന് തിയറ്ററുകളിലെത്തും. 8000ത്തിലധികം വർഷങ്ങളായി ജീവിക്കുന്ന അമരനായ കഥാപാത്രത്തെയാണ് ചിത്രത്തിൽ നിവിൻ പോളി അവതരിപ്പിക്കുന്നത്. ഗൗതം രാമചന്ദ്രൻ ചിത്രം 'റിച്ചി'ക്ക് ശേഷം നിവിൻ പോളി അഭിനയിക്കുന്ന തമിഴ് ചിത്രം കൂടിയാണിത്.

ദുൽഖർ സൽമാന്റെ വേഫെറർ ഫിലിംസ് ആണ് ചിത്രം കേരളത്തിൽ തിയറ്ററുകളിലെത്തിക്കുന്നത്. അഞ്ജലി, സൂരി എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. വി ഹൗസ് പ്രൊഡക്ഷൻസിന്റെ ബാനറിൽ സുരേഷ് കാമാച്ചിയാണ് നിർമാണം.

തിയറ്റർ റിലീസിന് മുമ്പ് തന്നെ വിവിധ അന്താരാഷ്ട്ര ചലച്ചിത്ര മേളകളിൽ ചിത്രം ശ്രദ്ധ നേടിയിരുന്നു. 53-ാമത് റോട്ടർഡാം അന്താരാഷ്ട്ര ചലച്ചിത്ര മേളയിൽ പ്രീമിയർ ചെയ്ത ചിത്രം മികച്ച നിരൂപക പ്രശംസ നേടി. ഫെസ്റ്റിവലിൽ വി പ്രോ ബിഗ് സ്ക്രീൻ അവാർഡിനായി മത്സരിച്ച 12 ചിത്രങ്ങളിൽ ഒന്നായിരുന്നു ഇത്. ഒരു ട്രെയിൻ യാത്രയ്ക്കിടയിൽ കണ്ടുമുട്ടുന്ന സാധാരണക്കാരനും നൂറ്റാണ്ടുകളായി പ്രണയം തേടി അലയുന്ന അമരനായ വ്യക്തിയും തമ്മിലുള്ള ബന്ധത്തിന്റെ കഥയാണ് ചിത്രം പ്രമേയമാക്കുന്നത്.

യുവാൻ ശങ്കർ രാജയാണ് സംഗീതം. രവി മരിയ, എൻ. അഴക പെരുമാൾ എന്നിവരും ചിത്രത്തിലുണ്ട്. ഛായാഗ്രഹണം: എൻ.കെ. ഏകാംബരൻ, എഡിറ്റിങ്: മതി വി.എസ്., പ്രൊഡക്ഷൻ ഡിസൈനർ: ഉമേഷ് ജെ. കുമാർ, ആക്ഷൻ: സ്റ്റണ്ട് സിൽവ, നൃത്തസംവിധാനം: സാൻഡി, കോസ്റ്റ്യൂം: ചന്ദ്രകാന്ത് സോനാവാനെ, മേക്കപ്പ്: പട്ടണം റഷീദ്.