ഏകൻ നായകനായി എത്തുന്ന 'ഹൈക്കു' റിലീസിനൊരുങ്ങുന്നു; തമിഴ്‌നാട് തിയേറ്റർ വിതരണാവകാശം സ്വന്തമാക്കി ശക്തി ഫിലിം ഫാക്ടറി

ചെന്നൈ: ഏകൻ, ശ്രീദേവി, ഫെമിന ജോർജ് എന്നിവരെ പ്രധാന കഥാപാത്രങ്ങളാക്കി യുവരാജ് ചിന്നസാമി സംവിധാനം ചെയ്യുന്ന പുതിയ ചിത്രം 'ഹൈക്കു' റിലീസിനൊരുങ്ങുന്നു. ചിത്രം ഒക്ടോബർ 23-ന് ആഗോളതലത്തിൽ തിയേറ്ററുകളിലെത്തും.

ചിത്രത്തിന്റേതായി പുറത്തുവന്ന ടീസറിന് വൻ പ്രതികരണമാണ് പ്രേക്ഷകരിൽ നിന്ന് ലഭിക്കുന്നത്. പ്രമുഖ വിതരണ കമ്പനിയായ ശക്തി ഫിലിം ഫാക്ടറിയാണ് തമിഴ്‌നാട്ടിലെ തിയേറ്റർ വിതരണാവകാശം സ്വന്തമാക്കിയത്.

വിഷൻ സിനിമ ഹൗസിന്റെ (Vision Cinema House) ബാനറിൽ ഡോ. ഡി. അരുളനന്ദുവും മാത്യു അരുളനന്ദുവും ചേർന്നാണ് ചിത്രം നിർമ്മിക്കുന്നത്. നിരൂപക ശ്രദ്ധ നേടിയ 'ജോ' (Joe) എന്ന ചിത്രം സംവിധാനം ചെയ്ത ഹരിഹരൻ റാം ആണ് 'ഹൈക്കു'വിന് അഡീഷണൽ സ്ക്രീൻപ്ലേ ഒരുക്കിയിരിക്കുന്നത്.

ചിത്രത്തിന്റെ ഒ.ടി.ടി സ്ട്രീമിംഗ് അവകാശം നെറ്റ്‌ഫ്ലിക്‌സ് സ്വന്തമാക്കി. സാധാരണയായി തിയേറ്റർ റിലീസിന് ശേഷം ഒ.ടി.ടി കരാറുകളിൽ എത്തുന്ന പതിവുരീതി മാറി, ചിത്രീകരണ ഘട്ടത്തിൽ തന്നെ നെറ്റ്‌ഫ്ലിക്‌സ് ഡിജിറ്റൽ അവകാശം സ്വന്തമാക്കിയത് ശ്രദ്ധേയമാണ്. തമിഴ്, തെലുങ്ക്, മലയാളം എന്നീ ഭാഷകളിലാണ് ചിത്രം പ്രദർശനത്തിനെത്തുന്നത്.