4 ദിവസം കൊണ്ട് 155 കോടി കളക്ഷൻ; നാനി ചിത്രം 'ദി പാരഡൈസ്' മുന്നേറുന്നു

കൊച്ചി: ബോക്സ് ഓഫീസിൽ വൻ തരംഗം സൃഷ്ടിച്ച് തെലുങ്ക് സൂപ്പർ താരം നാനി നായകനായ പാൻ-ഇന്ത്യൻ ചിത്രം 'ദി പാരഡൈസ്'. റിലീസ് ചെയ്ത് കേവലം നാല് ദിവസങ്ങൾ കൊണ്ട് 155 കോടിയുടെ ആഗോള കളക്ഷനാണ് ചിത്രം സ്വന്തമാക്കിയത്. ശ്രീകാന്ത് ഒഡേല സംവിധാനം ചെയ്ത ചിത്രം മികച്ച പ്രേക്ഷക പ്രതികരണങ്ങളോടെ പ്രദർശനം തുടരുകയാണ്.

ഹിറ്റ് ചിത്രം 'ദസറ'ക്ക് ശേഷം നാനിയും ശ്രീകാന്ത് ഒഡേലയും വീണ്ടും ഒന്നിക്കുന്ന ചിത്രമെന്ന പ്രത്യേകതയും ഇതിനുണ്ട്. ആക്ഷന് ഏറെ പ്രാധാന്യമുള്ള ചിത്രം അതോടൊപ്പം ഒരു അമ്മയും മകനും തമ്മിലുള്ള വൈകാരിക ബന്ധത്തിന്റെ കഥ കൂടിയാണ് പറയുന്നത്. ദുൽഖർ സൽമാന്റെ വേഫെറർ ഫിലിംസാണ് ചിത്രം കേരളത്തിലെ തിയറ്ററുകളിലെത്തിച്ചത്.

നാനിയുടെ കരിയറിലെ തന്നെ ഏറ്റവും വലിയ മാസ് വേഷമാണ് 'ജദാൽ' എന്ന കഥാപാത്രത്തിലൂടെ ചിത്രത്തിൽ അവതരിപ്പിച്ചിരിക്കുന്നത്. അനിരുദ്ധ് രവിചന്ദർ സംഗീതസംവിധാനം നിർവഹിച്ച ചിത്രത്തിലെ "ആയാ ഷേർ", "യേഷാ നഗുല" എന്നീ ഗാനങ്ങൾ ഇതിനോടകം സോഷ്യൽ മീഡിയയിൽ തരംഗമായിക്കഴിഞ്ഞു. 'കിൽ' എന്ന ചിത്രത്തിലൂടെ ശ്രദ്ധേയനായ ബോളിവുഡ് താരം രാഘവ് ജൂയലാണ് ചിത്രത്തിൽ വിക്രം മാലിക് എന്ന വില്ലൻ കഥാപാത്രത്തെ അവതരിപ്പിക്കുന്നത്.

കായദു ലോഹർ, സമ്പൂർണേഷ് ബാബു, മോഹൻ ബാബു, സോണാലി കുൽക്കർണി, ഈശ്വരി റാവു തുടങ്ങിയ വൻ താരനിര തന്നെ ചിത്രത്തിൽ അണിനിരക്കുന്നുണ്ട്. തെലുങ്ക്, മലയാളം, തമിഴ്, കന്നഡ, ഹിന്ദി, ബംഗാളി, ഇംഗ്ലീഷ്, സ്പാനിഷ് തുടങ്ങി എട്ട് ഭാഷകളിലാണ് ചിത്രം ലോകമെമ്പാടും റിലീസ് ചെയ്തിരിക്കുന്നത്.

എസ്.എൽ.വി സിനിമാസിന്റെ ബാനറിൽ സുധാകർ ചെറുകുറിയാണ് ചിത്രം നിർമിച്ചിരിക്കുന്നത്. സി.എച്ച്. സായ് ഛായാഗ്രഹണവും നവീൻ നൂലി എഡിറ്റിങും നിർവഹിച്ചിരിക്കുന്നു.