ന്യൂഡൽഹി: ഇന്ത്യൻ വിപണിയിലെ ഏറ്റവും കടുത്ത മത്സരമുള്ള 4 മീറ്ററിൽ താഴെയുള്ള കോംപാക്ട് എസ്യുവി വിഭാഗത്തിലേക്ക് ജർമൻ വാഹന നിർമാതാക്കളായ ഫോക്സ്വാഗൺ എത്തുന്നു. 2027-ഓടെ വിപണിയിലെത്തിക്കാൻ ലക്ഷ്യമിടുന്ന ഈ പുതിയ മോഡലിന്റെ പേരും ഔദ്യോഗിക സവിശേഷതകളും കമ്പനി പുറത്തുവിട്ടിട്ടില്ലെങ്കിലും, അടുത്തിടെ പുറത്തിറങ്ങിയ സ്കോഡ കൈലാക്കിന്റെ പ്ലാറ്റ്ഫോമിനെ (MQB-A0-IN) അടിസ്ഥാനമാക്കിയായിരിക്കും വാഹനം നിർമിക്കുക. ബ്രസീലിയൻ വിപണിയിലുള്ള ‘ടെറ’ എന്ന മോഡലിൽ നിന്ന് പ്രചോദനമുൾക്കൊണ്ടാണ് രൂപകൽപ്പനയെങ്കിലും, ഇന്ത്യൻ നികുതി ആനുകൂല്യങ്ങൾ പൂർണമായി പ്രയോജനപ്പെടുത്തുന്നതിനായി നീളം 4 മീറ്ററിൽ താഴെയായി ചുരുക്കും. സ്ലിം എൽഇഡി ഹെഡ്ലാമ്പുകൾ, കണക്റ്റഡ് ലൈറ്റ് സ്ട്രിപ്പ്, സ്പോർട്ടി ബമ്പർ, റൂഫ് റെയിലുകൾ എന്നിവയ്ക്കൊപ്പം കൂടുതൽ സ്പോർട്ടി ലുക്കിലുള്ള ‘ജിടി’ (GT) വേരിയന്റും വാഹനത്തിന് ലഭിച്ചേക്കും.
അകത്തളത്തിൽ 10 ഇഞ്ച് ടച്ച്സ്ക്രീൻ ഇൻഫോടൈൻമെന്റ് സിസ്റ്റം, ഡിജിറ്റൽ ഡ്രൈവർ ഡിസ്പ്ലേ, സൺറൂഫ്, വയർലെസ് ചാർജിംഗ്, വെന്റിലേറ്റഡ് സീറ്റുകൾ തുടങ്ങിയ അത്യാധുനിക സവിശേഷതകൾ ഉൾപ്പെടുത്തുമെന്നാണ് പ്രതീക്ഷിക്കുന്നത്. 1.0 ലിറ്റർ ടർബോ പെട്രോൾ എൻജിൻ കരുത്തേകുന്ന വാഹനത്തിൽ 6-സ്പീഡ് മാനുവൽ, 8-സ്പീഡ് ഓട്ടോമാറ്റിക് ഗിയർബോക്സ് ഓപ്ഷനുകൾ ലഭ്യമായേക്കും. എട്ട് ലക്ഷം മുതൽ 13 ലക്ഷം രൂപ വരെ പ്രതീക്ഷിക്കുന്ന വിലയിൽ വിപണിയിലെത്തുന്നതോടെ ടാറ്റ നെക്സോൺ, മാരുതി ബ്രെസ, ഹ്യുണ്ടായ് വെന്യു, മഹീന്ദ്ര എക്സ്യുവി 3എക്സ്ഒ എന്നിവരുമായി കടുത്ത മത്സരത്തിനാവും ഫോക്സ്വാഗൺ കളമൊരുക്കുക.
