“മമ്മൂക്ക ചീത്ത പറയുമ്പോഴല്ല, എന്റെ പേര് കൃത്യമായി വിളിക്കുമ്പോഴാണ് കാര്യം മനസ്സിലാകുന്നത്. സാധാരണ ‘എടാ’ എന്നേ വിളിക്കൂ. എന്നാൽ ‘സിദ്ദിഖേ’ എന്ന് നീട്ടി വിളിച്ചാൽ ദേഷ്യത്തിന്റെ ചൂടാണെന്ന് തിരിച്ചറിയാം. പക്ഷേ, അതും ഞാൻ ആസ്വദിക്കുകയാണ് പതിവ്…” — സിദ്ദിഖ്
ലയാള സിനിമയുടെ വെള്ളിവെളിച്ചത്തിൽ നാലു പതിറ്റാണ്ടിലേറെയായി സ്വന്തം ഇടം അടയാളപ്പെടുത്തിയ നടനാണ് സിദ്ദിഖ്. കോമഡിയിലൂടെ തുടങ്ങി വില്ലനായും സ്വഭാവനടനായുമുള്ള അദ്ദേഹത്തിന്റെ പ്രകടനം ഇന്നും സിനിമാപ്രേമികൾക്കിടയിൽ ചർച്ചയാണ്. ഇതിനിടയിലാണ് മലയാളത്തിന്റെ മെഗാസ്റ്റാർ മമ്മൂട്ടിയുമായുള്ള തന്റെ ആത്മബന്ധത്തിന്റെ കൗതുകകരമായ വിശേഷങ്ങൾ സിദ്ദിഖ് മാധ്യമങ്ങളോട് പങ്കുവെച്ചത്.
സഹോദരതുല്യമായ സൗഹൃദം
വെള്ളിത്തിരയിൽ പലപ്പോഴും ഒന്നിച്ച് സഹോദരങ്ങളായി വേഷമിട്ടിട്ടുള്ള ഇരുവരും ജീവിതത്തിലും അതുപോലെ തന്നെയാണ്. മമ്മൂട്ടിയെ ഒരു ജ്യേഷ്ഠതുല്യനായാണ് കാണുന്നതെന്ന് സിദ്ദിഖ് പലവട്ടം വ്യക്തമാക്കിയിട്ടുണ്ട്. മമ്മൂട്ടി വിലക്കിയ കാര്യങ്ങൾ താനും ജീവിതത്തിൽ ഒഴിവാക്കിയിട്ടുണ്ടെന്ന് പറയുന്ന സിദ്ദിഖ്, തങ്ങളുടെ സൗഹൃദത്തിന്റെ ആഴം വെളിപ്പെടുത്തുന്ന ചില അനുഭവങ്ങളും പങ്കുവെക്കുന്നു.
ആഗസ്റ്റ് 15 സെറ്റിലെ ആ കരുതൽ
‘ആഗസ്റ്റ് 15’ സിനിമയുടെ ചിത്രീകരണ വേളയിലെ ഓർമ്മകൾ സിദ്ദിഖ് അയ്യറുന്നു. അന്ന് ജോഷി സംവിധാനം ചെയ്ത ചിത്രത്തിൽ മമ്മൂട്ടിയുടെ ഭാഗങ്ങൾ നേരത്തെ തീർന്നാലും സിദ്ദിഖിന്റെ കൂടെ മടങ്ങാൻ വേണ്ടി മാത്രം അദ്ദേഹം സെറ്റിൽ കാത്തിരിക്കുമായിരുന്നു. ഒന്നിച്ച് യാത്ര ചെയ്ത്, വർത്തമാനങ്ങൾ പറഞ്ഞുള്ള ആ യാത്രകളാണ് തങ്ങളുടെ സൗഹൃദത്തിന്റെ മധുരമെന്ന് താരം ഓർക്കുന്നു.
പിണക്കവും ഒരു ഉച്ചഭക്ഷണവും
മമ്മൂട്ടിയുടെ ദേഷ്യത്തെക്കുറിച്ചുള്ള മറ്റൊരു രസകരമായ സംഭവം സിദ്ദിഖ് വിവരിക്കുന്നത് ഇങ്ങനെയാണ്:
ഒരിക്കൽ സെറ്റിൽ വെച്ച് സിദ്ദിഖ് പറഞ്ഞ ഒരു തമാശ മമ്മൂട്ടിക്ക് ഇഷ്ടപ്പെട്ടിരുന്നില്ല. എന്നാൽ, ഇതൊന്നും അറിയാതെ ഉച്ചസമയത്ത് മമ്മൂട്ടിക്കായി കൊണ്ടുവന്ന പ്രത്യേക ചോരിൽ നിന്ന് സിദ്ദിഖ് തന്റെ പ്ലേറ്റിലേക്ക് കോരിയെടുത്തു. മമ്മൂട്ടി ബാക്കി ചോറും സിദ്ദിഖിന്റെ പ്ലേറ്റിലേക്ക് തന്നെ ഇട്ടുകൊടുത്തു. മീൻകറിയും കൂട്ടി സിദ്ദിഖ് അത് ആസ്വദിച്ചു കഴിക്കുകയും ചെയ്തു.
അന്ന് വൈകുന്നേരം മമ്മൂട്ടിയുടെ വീട്ടിലെത്തിയപ്പോഴാണ് ആ കഥ അറിയുന്നത്. “ഇന്ന് സെറ്റിൽ വെച്ച് ഇവനൊരു തമാശ പറഞ്ഞിട്ട് എനിക്ക് ദേഷ്യമായി, ഞാൻ ഇവനോട് പിണങ്ങി; അതീ പൊട്ടനൊഴിച്ച് ബാക്കി എല്ലാവർക്കും മനസ്സിലായി” എന്ന് മമ്മൂട്ടി തന്റെ ഭാര്യ സുൽഫത്തിനോട് പറയുന്നത് കേട്ടപ്പോഴാണ് താൻ ആ പിണക്കത്തെക്കുറിച്ചേ അറിഞ്ഞതെന്ന് സിദ്ദിഖ് ചിരിയോടെ ഓർക്കുന്നു.
മമ്മൂട്ടിയുടെ ശാസനകളോ വഴക്കോ തനിക്ക് ഒരിക്കലും ഭയമുണ്ടാക്കിയിട്ടില്ലെന്നും, അദ്ദേഹത്തിന്റെ അടുത്തുനിന്ന് എത്ര തവണ ചീത്ത കേട്ടിട്ടുണ്ടെങ്കിലും അതൊക്കെ തനിക്ക് ഗമയുള്ള കാര്യമാണെന്നും പറഞ്ഞാണ് സിദ്ദിഖ് ഈ സൗഹൃദക്കഥകൾ അവസാനിപ്പിക്കുന്നത്.
