ബ്യൂണസ് അയേഴ്സ്: ഫൈനൽ പോരാട്ടത്തിന് ശേഷം സ്പെയിൻ ടീമിന് ലോകകപ്പ് കിരീടം സമ്മാനിക്കുന്ന വേളയിൽ അർജന്റീന താരങ്ങൾ പുറംതിരിഞ്ഞുനിന്ന സംഭവത്തിൽ വിശദീകരണവുമായി പ്രതിരോധ താരം ലിസാൻഡ്രോ മാർട്ടിനസ്. സ്പെയിനിനോട് യാതൊരുവിധ അനാദരവും കാണിച്ചിട്ടില്ലെന്നും, തോൽവിയിലും തങ്ങളെ ആവേശത്തോടെ പിന്തുണച്ച ആരാധകർക്ക് സ്നേഹവും നന്ദിയും പ്രകടിപ്പിക്കുക മാത്രമാണ് ആ നിമിഷത്തിൽ ചെയ്തതെന്നും താരം വ്യക്തമാക്കി.
വലിയ പോരാട്ടത്തിനൊടുവിൽ കലാശപ്പോരിൽ പരാജയപ്പെട്ടിട്ടും അർജന്റീന ആരാധകർ സ്റ്റേഡിയത്തിൽ പാട്ടുപാടി ടീമിനെ ആവേശത്തോടെ പിന്തുണയ്ക്കുന്നുണ്ടായിരുന്നു. ഫൈനൽ തോറ്റ നിരാശയിലായിരുന്ന ടീമിന് വലിയ ഊർജമാണ് ആരാധകരുടെ ആ നിലക്കാത്ത പിന്തുണ നൽകിയത്. അതുകൊണ്ടാണ് ആ സമയത്ത് ആരാധകരിലേക്ക് ശ്രദ്ധ തിരിക്കാനും അവരെ അഭിവാദ്യം ചെയ്യാനും തോന്നിയതെന്ന് മാർട്ടിനസ് പറഞ്ഞു.
“ഞങ്ങൾ എപ്പോഴും എതിരാളികളെ ബഹുമാനിക്കുന്നവരാണ്. സ്പെയിനിനെ അഭിനന്ദിച്ചില്ലെന്ന വാർത്തകൾ പൂർണ്ണമായും തെറ്റാണ്. ട്രോഫി വിതരണത്തിന് മുൻപ് തന്നെ അവരുടെ കളിക്കാരെയും കോച്ചിംഗ് സ്റ്റാഫിനെയും ഞങ്ങൾ നേരിട്ട് കണ്ട് ആശംസകൾ അറിയിച്ചിരുന്നു.” — ലിസാൻഡ്രോ മാർട്ടിനസ്
പുറത്തു പ്രചരിക്കുന്നത് പോലെയുള്ള മനഃപൂർവ്വമായ അവഗണനയോ അനാദരവോ അവിടെ ഉണ്ടായിട്ടില്ലെന്നും സ്പാനിഷ് ടീമിന്റെ കിരീടനേട്ടത്തെ പൂർണ്ണമായും ബഹുമാനിക്കുന്നുവെന്നും അദ്ദേഹം കൂട്ടിച്ചേർത്തു.
മത്സരത്തിന്റെ അവസാന വിസിലിന് പിന്നാലെ ഇരു ടീമുകളിലെയും താരങ്ങൾ തമ്മിൽ കളിക്കളത്തിൽ നേരിയ സംഘർഷമുണ്ടായിരുന്നു. ഇതിന് ശേഷ നടന്ന പുരസ്കാര വിതരണ ചടങ്ങിൽ സ്പെയിനിന് ട്രോഫി കൈമാറുന്ന സമയത്ത് അർജന്റീന താരങ്ങൾ വേദിക്ക് പുറംതിരിഞ്ഞു നിന്നത് വലിയ രീതിയിൽ വിമർശിക്കപ്പെടുകയും കായികലോകത്ത് വൻ ചർച്ചയാവുകയും ചെയ്തിരുന്നു. ഈ വിവാദങ്ങൾക്കാണ് ഇപ്പോൾ ലിസാൻഡ്രോ മാർട്ടിനസ് കൃത്യമായ മറുപടി നൽകിയിരിക്കുന്നത്.
