പ്രധാനമന്ത്രി മാപ്പ് പറയണം, കേന്ദ്ര വിദ്യാഭ്യാസ മന്ത്രിയെ പുറത്താക്കണം: രാഹുൽ ഗാന്ധി
ന്യൂഡൽഹി: രാജ്യത്ത് സംവാദങ്ങൾക്കു പകരം അടിച്ചമർത്തലുകൾക്കാണ് കേന്ദ്ര സർക്കാർ മുൻഗണന നൽകുന്നതെന്ന് കോൺഗ്രസ് പാർലമെന്ററി പാർട്ടി അധ്യക്ഷ സോണിയാ ഗാന്ധി. കർഷകർക്കും സാമൂഹിക പ്രവർത്തകർക്കും നേരെ പ്രയോഗിച്ച ഭരണകൂട ദമനമുറകൾ ഇപ്പോൾ വിദ്യാർത്ഥികൾക്കു നേരെയും തുടരുകയാണെന്ന് അവർ കുറ്റപ്പെടുത്തി.
വിദ്യാഭ്യാസ മേഖലയെ കേന്ദ്രം പൂർണ്ണമായും തകർത്തു. വിദ്യാർത്ഥി പ്രക്ഷോഭങ്ങൾ സർക്കാരിന്റെ യഥാർത്ഥ സ്വഭാവം ജനങ്ങൾക്ക് മുന്നിൽ തുറന്നുകാട്ടിയെന്നും പ്രതിപക്ഷം വിദ്യാർത്ഥി സമൂഹത്തോടൊപ്പം ഉറച്ചുനിൽക്കുമെന്നും സോണിയാ ഗാന്ധി വ്യക്തമാക്കി.
വിദ്യാർത്ഥികളുടെ ന്യായമായ ആവശ്യങ്ങൾക്കായി വിട്ടുവീഴ്ചയില്ലാത്ത പോരാട്ടം തുടരുമെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധിയും വ്യക്തമാക്കി. വിഷയം കൈകാര്യം ചെയ്യുന്നതിൽ പരാജയപ്പെട്ട പ്രധാനമന്ത്രി രാജ്യത്തോട് മാപ്പ് പറയണമെന്നും കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാനെ ഉടനടി പുറത്താക്കണമെന്നും അദ്ദേഹം ആവശ്യപ്പെട്ടു. ശാന്തമായി പ്രതിഷേധിച്ച വിദ്യാർത്ഥികളെ മർദ്ദിച്ചൊതുക്കിയ ഉദ്യോഗസ്ഥർക്കെതിരെ കർശന നടപടി വേണമെന്നും രാഹുൽ ഗാന്ധി എക്സിൽ (X) കുറിച്ചു.
സമരം ശക്തമാക്കാൻ സി.ജെ.പി; ഡൽഹിയിൽ സുരക്ഷ ശക്തമാക്കി
സാമൂഹിക പ്രവർത്തകൻ സോനം വാങ്ചുക് നിരാഹാര സമരം അവസാനിപ്പിച്ചെങ്കിലും കേന്ദ്ര വിദ്യാഭ്യാസ മന്ത്രിയുടെ രാജി ആവശ്യപ്പെട്ടുള്ള പ്രക്ഷോഭത്തിൽ നിന്ന് പിന്നോട്ടില്ലെന്ന് കൊക്ക്റോച്ച് ജനതാ പാർട്ടി (സി.ജെ.പി) അറിയിച്ചു. രാജ്യത്തിന്റെ മനസ്സാക്ഷിയെ തൊട്ടുണർത്തിയ പോരാട്ടമാണ് വാങ്ചുക് നടത്തിയത്. സ്വന്തം ജീവൻ പണയം വെച്ചുള്ള അദ്ദേഹത്തിന്റെ പോരാട്ടം അവസാനിച്ചതിൽ ആശ്വാസമുണ്ടെന്ന് സി.ജെ.പി സ്ഥാപകൻ അഭിജീത് ദിപ്കെ പറഞ്ഞു.
ജന്തർ മന്തറിൽ സമാധാനപരമായ പ്രതിഷേധം തുടരുമെന്ന് അറിയിച്ച സി.ജെ.പി, വിഷയത്തിൽ രാജ്യവ്യാപക പ്രതിഷേധത്തിന് ആഹ്വാനം നൽകിയിട്ടുണ്ട്. ജില്ലാ കേന്ദ്രങ്ങൾ കേന്ദ്രീകരിച്ചാകും പ്രക്ഷോഭം.
അതേസമയം, പ്രക്ഷോഭം കനക്കുന്ന പശ്ചാത്തലത്തിൽ തലസ്ഥാനത്ത് പൊലീസ് നിയന്ത്രണങ്ങൾ കടുപ്പിച്ചു. ഗാന്ധി സ്മൃതിയിലേക്ക് നടന്ന മാർച്ചിന് പിന്നാലെ, വിഷയത്തിൽ പ്രതിപക്ഷ പാർട്ടികളുടെ കൂട്ടായ്മയായ ‘ഇന്ത്യ’ മുന്നണി പാർലമെന്റിനകത്തും പ്രതിഷേധം ശക്തമാക്കാനാണ് തീരുമാനിച്ചിട്ടുള്ളത്.
