കോഴിക്കോട്: ജീവമാതാ കാരുണ്യ ഭവനിലൂടെ സോഷ്യൽ മീഡിയയിൽ ശ്രദ്ധേയരായ അനാമികയ്ക്കും ഭർത്താവ് വിഷ്ണുവിനുമെതിരെ നടക്കുന്ന വ്യാജ അപവാദ പ്രചാരണങ്ങളിൽ രൂക്ഷവിമർശനവുമായി അനാമിക. കാരുണ്യ ഭവനിലെ അന്തേവാസികളായ അമ്മമാരുടെ പണം തട്ടിയെടുത്താണ് തങ്ങൾ ജീവിക്കുന്നതെന്ന തരത്തിലുള്ള കമന്റുകൾക്കും ആരോപണങ്ങൾക്കും പുതിയ വീഡിയോയിലൂടെ മറുപടി നൽകുകയായിരുന്നു അവർ.
ജീവമാതാ കാരുണ്യ ഭവൻ നടത്തിപ്പുകാരി ഉദയ ഗിരിജയുടെ മകൻ വിഷ്ണുവും അവിടെ അന്തേവാസിയായിരുന്ന അനാമികയും തമ്മിലുള്ള വിവാഹം സോഷ്യൽ മീഡിയയിൽ ഏറെ ചർച്ചയായിരുന്നു. വിവാഹശേഷം യൂട്യൂബിലും ഫേസ്ബുക്കിലും സജീവമായ ഇവരുടെ ജീവിതത്തെക്കുറിച്ച് കഴിഞ്ഞദിവസം ചിലർ ഉന്നയിച്ച വിമർശനങ്ങളാണ് പുതിയ വീഡിയോക്ക് ആധാരം.
അനാമിക വീഡിയോയിലൂടെ വ്യക്തമാക്കിയത്:
സ്വന്തം വരുമാനത്തിൽ ജീവിതം: “ഞാനും ഭർത്താവും മകളും വെവ്വേറെ വീടെടുത്താണ് താമസിക്കുന്നത്. അമ്മയും കുടുംബവും സ്ഥാപനത്തോട് ചേർന്നുള്ള വീട്ടിലാണ് കഴിയുന്നത്. എന്റെ വീട്ടുചെലവുകൾ ഭർത്താവാണ് നോക്കുന്നത്. പതിനയ്യായിരത്തിന് മുകളിൽ ശമ്പളമുള്ള ജോലിക്ക് അദ്ദേഹം പോകുന്നുണ്ട്.”
ഡിജിറ്റൽ കണ്ടന്റ് അധ്വാനം: “കുഞ്ഞിന്റെ കാര്യങ്ങളും വീട്ടുജോലിയും പഠനവും കഴിഞ്ഞുള്ള ഒഴിവുസമയത്താണ് യൂട്യൂബിലും ഫേസ്ബുക്കിലും വിഡിയോകൾ ചെയ്യുന്നത്. ഈ അധ്വാനത്തിൽ നിന്ന് ലഭിക്കുന്ന പണം കൊണ്ട് സ്വന്തം കാര്യങ്ങൾ നോക്കാൻ എനിക്ക് സാധിക്കുന്നുണ്ട്.”
കഠിനാധ്വാനത്തിന്റെ നാളുകൾ: “ഗർഭിണിയായിരുന്ന സമയത്ത് ഭർത്താവ് രാത്രിയെന്നോ പകലെന്നോ ഇല്ലാതെ വെയിലും മഴയും കൊണ്ട് ഒരുപാട് കഷ്ടപ്പെട്ടാണ് എന്നെ നോക്കിയത്. മകളെ ഒറ്റയ്ക്ക് പരിപാലിക്കാൻ എനിക്ക് പ്രാപ്തിയായ ശേഷമാണ് അദ്ദേഹം വീണ്ടും ജോലിക്ക് പോയിത്തുടങ്ങിയത്. കണ്ടന്റ് ക്രിയേഷനായാലും മറ്റു ജോലികളായാലും അതിന്റേതായ അധ്വാനമുണ്ട്.”
