യുഎസ്-ഇറാൻ സൈനിക സംഘർഷം വീണ്ടും വഷളായതോടെ ആഗോള വ്യാപാര മേഖല കടുത്ത ആശങ്കയിൽ. ലോകത്തിലെ ഏറ്റവും പ്രധാനപ്പെട്ട എണ്ണക്കടത്തു പാതയായ ഹോർമുസ് കടലിടുക്കിലൂടെയുള്ള കപ്പൽ ഗതാഗതം അതിവേഗം കുറയുന്നതായി റിപ്പോർട്ട്. ഷിപ്പിംഗ് ഡാറ്റാ നിരീക്ഷണ ഏജൻസിയായ ‘കെപ്ലറിനെ’ ഉദ്ധരിച്ച് അന്താരാഷ്ട്ര വാർത്താ ഏജൻസിയായ റോയിട്ടേഴ്സ് ആണ് ഈ കണക്കുകൾ പുറത്തുവിട്ടത്.
കണക്കുകൾ പറയുന്നത്: സുരക്ഷാഭീഷണിയെത്തുടർന്ന് തിങ്കളാഴ്ച വെറും 4 കപ്പലുകൾ മാത്രമാണ് ഹോർമുസ് കടലിടുക്ക് മുറിച്ചുകടന്നത്. ഞായറാഴ്ച ഇത് 7 എണ്ണമായിരുന്നു.
ഇറാന്റെ സാന്നിധ്യം: തിങ്കളാഴ്ച യാത്ര തിരിച്ചുവിട്ട ഭൂരിഭാഗം കപ്പലുകളും ഇറാന്റെ സമുദ്രപാതയാണ് ഉപയോഗപ്പെടുത്തിയത്.
മുൻകരുതലുകൾ: അപകടസാധ്യത ഒഴിവാക്കാൻ മുൻനിര അന്താരാഷ്ട്ര ഷിപ്പിംഗ് കമ്പനികൾ യാത്രകൾ താൽക്കാലികമായി റദ്ദാക്കുകയോ, കൂടുതൽ സമയമെടുക്കുന്ന ഇതര സമുദ്രപാതകൾ തിരഞ്ഞെടുക്കുകയോ ചെയ്യുകയാണ്.
ലോകത്തെ പ്രധാന ഇന്ധന വിതരണ ശൃംഖലയെ ബാധിക്കുന്ന ഈ തടസ്സം വരുംദിവസങ്ങളിൽ ആഗോള സമ്പദ്വ്യവസ്ഥയെയും എണ്ണവിലയെയും പ്രതികൂലമായി ബാധിച്ചേക്കുമെന്നാണ് വിലയിരുത്തൽ.
