തിരുവനന്തപുരം: സംസ്ഥാനത്ത് തുടരുന്ന ശക്തമായ മഴക്കെടുതികളില് ഇതുവരെ 28 മരണം റിപ്പോര്ട്ട് ചെയ്തു. കാണാതായ നാലുപേര്ക്കായുള്ള തിരച്ചില് തുടരുകയാണ്. ദുരിതാശ്വാസ പ്രവര്ത്തനങ്ങളുടെ ഭാഗമായി സംസ്ഥാനത്തെ 460 ക്യാമ്പുകളിലായി 30,315 പേരെ മാറ്റിപ്പാര്പ്പിച്ചിട്ടുണ്ട്. ക്യാമ്പുകള് പ്രവര്ത്തിക്കുന്ന എല്ലാ വിദ്യാഭ്യാസ സ്ഥാപനങ്ങള്ക്കും അവധി തുടരുമെന്ന് അധികൃതര് അറിയിച്ചു. അടുത്ത മൂന്ന് മണിക്കൂറില് പത്തനംതിട്ട, ഇടുക്കി ജില്ലകളില് ശക്തമായ മഴ പെയ്യുമെന്നാണ് മുന്നറിയിപ്പ്.
ആശ്വാസമായി ചില പ്രദേശങ്ങളില് വെള്ളമിറങ്ങിത്തുടങ്ങി
ദുരിതബാധിത പ്രദേശങ്ങളില് നിന്ന് പതുക്കെ വെള്ളമിറങ്ങിത്തുടങ്ങിയത് ചെറിയൊരു ആശ്വാസമായിട്ടുണ്ട്. പത്തനംതിട്ട, കോട്ടയം ജില്ലകളിലെ ഉയര്ന്ന പ്രദേശങ്ങളിലാണ് വെള്ളമിറങ്ങി തുടങ്ങിയത്. പൂര്ണ്ണമായും വെള്ളം ഒഴിഞ്ഞുപോയിട്ടില്ലെങ്കിലും, ഈ ജില്ലകളുടെ പടിഞ്ഞാറന് മേഖലകളില് ജലനിരപ്പ് താഴ്ന്നുതുടങ്ങിയിട്ടുണ്ട്. കോട്ടയത്ത് ഇന്നലെ പകല് കാര്യമായ മഴയുണ്ടാകാതിരുന്നത് അനുകൂല സാഹചര്യമൊരുക്കിയിട്ടുണ്ട്. ഇതേ കാലാവസ്ഥ തുടരുകയാണെങ്കില് ജലനിരപ്പ് കൂടുതല് താഴുമെന്നാണ് പ്രതീക്ഷിക്കുന്നത്.
ഓറഞ്ച്, യെല്ലോ അലര്ട്ടുകള് പ്രഖ്യാപിച്ചു
കേരളത്തില് അടുത്ത മൂന്ന് ദിവസംകൂടി അതിശക്തമായ മഴ തുടരുമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്കി.
- ഓറഞ്ച് അലേർട്ട് പ്രഖ്യാപിച്ച ജില്ലകള്: പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, കണ്ണൂര്, കാസര്കോട്.
- യെല്ലോ അലർട്ട് പ്രഖ്യാപിച്ച ജില്ലകള്: മറ്റു ശേഷിക്കുന്ന ജില്ലകള്.
മലയോര മേഖലകളില് അതീവ ജാഗ്രതാ നിര്ദേശം പുറപ്പെടുവിച്ചിട്ടുണ്ട്. മണിക്കൂറില് 50 കിലോമീറ്റര് വരെ വേഗതയില് കാറ്റ് വീശാനും തെക്കന് തീരങ്ങളില് കടലാക്രമണത്തിനും സാധ്യതയുള്ളതിനാല് മത്സ്യബന്ധനത്തിനുള്ള വിലക്ക് കര്ശനമായി തുടരും.
വിദ്യാഭ്യാസ സ്ഥാപനങ്ങള്ക്ക് അവധി
ദുരിതാശ്വാസ ക്യാമ്പുകള് പ്രവര്ത്തിക്കുന്ന കോഴിക്കോട്, കോട്ടയം, ആലപ്പുഴ, വയനാട്, തൃശൂര്, പത്തനംതിട്ട ജില്ലകളിലെ വിദ്യാഭ്യാസ സ്ഥാപനങ്ങള്ക്ക് ജില്ലാ കളക്ടര്മാര് അവധി പ്രഖ്യാപിച്ചിട്ടുണ്ട്. കൂടാതെ കോട്ടയം താലൂക്ക്, പത്തനംതിട്ട തിരുവല്ല താലൂക്ക്, ആലപ്പുഴ ജില്ലയിലെ കുട്ടനാട്, ചെങ്ങന്നൂര്, കാര്ത്തികപ്പള്ളി താലൂക്കുകള് എന്നിവിടങ്ങളിലെ പ്രൊഫഷണല് കോളേജുകള്, അങ്കണവാടികള്, ട്യൂഷന് സെന്ററുകള് എന്നിവയ്ക്കും അവധി ബാധകമാണ്.
