“ലോകത്തിൽ ഏറ്റവും കൂടുതൽ ടി20 റൺസുള്ള താരമാവുക എന്നത് വലിയ അഭിമാനമാണ്. ക്രിസ് ഗെയ്ൽ, കെയ്റോൺ പൊള്ളാർഡ് തുടങ്ങിയ വമ്പന്മാരെ പിന്നിലാക്കാൻ കഴിഞ്ഞത് കരിയറിലെ സുവർണ്ണ നിമിഷമാണ്. എങ്കിലും ഒരുനാൾ ഈ റെക്കോർഡ് തകരും; അത് മിക്കവാറും ഇന്ത്യയുടെ കൗമാരതാരം വൈഭവ് സൂര്യവംശിയായിരിക്കും.”
ലണ്ടൻ: ടി20 ക്രിക്കറ്റിൽ എക്കാലത്തെയും മികച്ച റൺവേട്ടക്കാരനെന്ന ചരിത്ര റെക്കോർഡ് സ്വന്തമാക്കി ഇംഗ്ലണ്ട് സൂപ്പർ താരം ജോസ് ബട്ലർ. ഒപ്പം, തന്റെ റെക്കോർഡ് തകർക്കാൻ പോന്ന ഇന്ത്യൻ കൗമാര വിസ്മയം വൈഭവ് സൂര്യവംശിയെ പ്രശംസകൊണ്ടു മൂടുകയും ചെയ്തു താരം.
ദി ഹണ്ട്രഡ് ലീഗിൽ വെൽഷ് ഫെയറിനെതിരായ മത്സരത്തിൽ മാഞ്ചസ്റ്റർ സൂപ്പർ ജയന്റ്സിനായി തകർപ്പൻ അർധസെഞ്ചുറി (27 പന്തിൽ പുറത്താവാതെ 51) നേടിയാണ് ബട്ലർ ചരിത്രമെഴുതിയത്. വെസ്റ്റ് ഇൻഡീസ് ഇതിഹാസം കെയ്റോൺ പൊള്ളാർഡിന്റെ പേരിലുണ്ടായിരുന്ന 14,803 റൺസ് എന്ന റെക്കോർഡാണ് ബട്ലർ (14,833 റൺസ്) മറികടന്നത്.
കഴിഞ്ഞ കുറച്ചുകാലമായി ഫോം കണ്ടെത്താനാവാതെ കടുത്ത വിമർശനങ്ങൾ നേരിട്ട ബട്ലറുടെ അവിശ്വസനീയ തിരിച്ചുവരവുകൂടിയാണിത്. മത്സരശേഷം സ്കൈ സ്പോർട്സിനോട് സംസാരിക്കുകയായിരുന്നു അദ്ദേഹം.
“ക്രിക്കറ്റിൽ കാര്യങ്ങൾ എത്ര വേഗത്തിലാണ് മാറുന്നത്! ഏതാനും മാസങ്ങൾക്ക് മുൻപ് വരെ ഫോമില്ലാതെ ഞാൻ ഉഴറുകയായിരുന്നു. എന്നാൽ ഇപ്പോൾ കരിയറിലെ തന്നെ ഏറ്റവും മികച്ച രീതിയിൽ ബാറ്റ് ചെയ്യാൻ കഴിയുന്നു. മോശം സമയത്ത് ഒന്നുകിൽ തോൽവി സമ്മതിച്ച് പിന്മാറാം, അല്ലെങ്കിൽ ആഞ്ഞുശ്രമിച്ച് ഫോമിലേക്ക് തിരിച്ചെത്താം. ഞാൻ രണ്ടാമത്തെ വഴിയാണ് തിരഞ്ഞെടുത്തത്”— ബട്ലർ വ്യക്തമാക്കി.
കെയ്റോൺ പൊള്ളാർഡ് ഡഗ്ഔട്ടിലുണ്ടായിരുന്ന എംഐ ലണ്ടനെതിരെ കഴിഞ്ഞ മത്സരത്തിൽ കളിക്കുമ്പോൾ തന്നെ ഈ നേട്ടത്തിലെത്താൻ ആഗ്രഹിച്ചിരുന്നതായും താരം കൂട്ടിച്ചേർത്തു.
