ഹോട്ടൽ മുറിയിൽ 39 -കാരിയുടെ മൃതദേഹം; നിർണായക തെളിവായി സിസിടിവി; ജപ്പാനിൽ യുഎസ് മറീൻ അറസ്റ്റിൽ!

ടോക്കിയോ: ജപ്പാനിലെ ഒക്കിനാവയിൽ 39-കാരിയെ ഹോട്ടൽ മുറിയിൽ കൊല്ലപ്പെട്ട നിലയിൽ കണ്ടെത്തിയ സംഭവത്തിൽ യു.എസ് സൈനികൻ അറസ്റ്റിൽ. ഫ്യൂട്ടൻമ എയർ സ്റ്റേഷനിലെ മറൈൻ ലാൻസ് കോർപ്പറൽ ഡെവിൻ ജേക്കബ് ബാലാർഡിനെയാണ് (20) പ്രാദേശിക പോലീസ് കസ്റ്റഡിയിലെടുത്തത്. ഒക്ടോബർ മൂന്നിന് പുലർച്ചെ നഹയിലെ ഹോട്ടലിൽ വെച്ച് നഹ സ്വദേശിയായ അന്ന യാഗിയെ കഴുത്തുഞെരിച്ച് കൊലപ്പെടുത്തുകയും സാധനങ്ങൾ മോഷ്ടിക്കുകയും ചെയ്തുവെന്നാണ് കേസ്.

സി.സി.ടി.വി ദൃശ്യങ്ങളും പ്രതിയുടെ ശരീരത്തിലെ ടാറ്റൂ അടക്കമുള്ള രൂപസാദൃശ്യങ്ങളും പരിശോധിച്ചാണ് പോലീസ് പ്രതിയെ തിരിച്ചറിഞ്ഞത്. കഴുത്തുഞെരിഞ്ഞുണ്ടായ ശ്വാസംമുട്ടലാണ് മരണകാരണമെന്ന് പോസ്റ്റ്‌മോർട്ടം റിപ്പോർട്ടിൽ പറയുന്നു. എന്നാൽ, ആരോപണങ്ങൾ പ്രതി നിഷേധിച്ചിട്ടുണ്ട്.

സംഭവത്തെ തുടർന്ന് ഒക്കിനാവയിൽ യു.എസ് സൈനിക സാന്നിധ്യത്തിനെതിരെ പ്രാദേശിക പ്രതിഷേധം കടുത്തു. ജപ്പാൻ സർക്കാർ വിഷയത്തിൽ കടുത്ത അമർഷം രേഖപ്പെടുത്തുകയും അന്വേഷണത്തിൽ പൂർണ സഹകരണം ആവശ്യപ്പെടുകയും ചെയ്തു.

വിദേശ രാജ്യങ്ങളിൽ അമേരിക്കൻ സൈനികർ ഉൾപ്പെടുന്ന കുറ്റകൃത്യങ്ങൾ വീണ്ടും ചർച്ചയാകാൻ ഈ സംഭവം ഇടയാക്കിയിട്ടുണ്ട്. അടുത്തിടെ തായ്‌ലൻഡിൽ യു.എസ് നാവികർ മദ്യപിച്ച് ബഹളമുണ്ടാക്കിയതും റഷ്യ, വെനസ്വേല, ഫിലിപ്പീൻസ് എന്നിവിടങ്ങളിൽ മുൻ സൈനികർ നിയമനടപടികൾ നേരിട്ടതും മുൻ ഉദാഹരണങ്ങളായി ചൂണ്ടിക്കാണിക്കപ്പെടുന്നു.