നന്ദകുമാറിന്റെ പരാമർശത്തെ ന്യായീകരിച്ച് പിണറായി; യുഡിഎഫ് സർക്കാരിനും പൊലീസിനുമെതിരെ വിമർശനം

മലപ്പുറം: സി.പി.എം നേതാവ് പി. നന്ദകുമാറിന്റെ മലപ്പുറത്തെക്കുറിച്ചുള്ള വിവാദ പരാമർശത്തെ ന്യായീകരിച്ച് പ്രതിപക്ഷ നേതാവ് പിണറായി വിജയൻ. മലപ്പുറത്തെ മതസൗഹാർദ അന്തരീക്ഷം തകർക്കാൻ മതമൗലികവാദികളും വർഗീയ ശക്തികളും ശ്രമിക്കുന്നുണ്ടെന്നും അതിനെതിരെ ജാഗ്രത പാലിക്കണമെന്നുമാണ് നന്ദകുമാർ ഉദ്ദേശിച്ചതെന്ന് അദ്ദേഹം വിശദീകരിച്ചു. നന്ദകുമാറിന്റെ പ്രസംഗത്തെ രാഷ്ട്രീയ എതിരാളികൾ വളച്ചൊടിച്ച് പ്രചരിപ്പിക്കുകയാണെന്നും പിണറായി ആരോപിച്ചു. മലപ്പുറത്ത് സംഘടിപ്പിച്ച സി.പി.എം വിശാല ജില്ലാ കമ്മിറ്റി യോഗത്തിനു ശേഷമുള്ള പൊതുസമ്മേളനത്തിൽ സംസാരിക്കുകയായിരുന്നു അദ്ദേഹം.

കോൺഗ്രസ് അധികാരത്തിലെത്തിയതുമുതൽ ആർ.എസ്.എസ് അജണ്ട നടപ്പാക്കാനാണ് ശ്രമിക്കുന്നതെന്ന് പിണറായി വിജയൻ ആരോപിച്ചു. വന്ദേമാതരം പൂർണമായി ചൊല്ലിയതും കേന്ദ്രത്തിന്റെ വഖഫ് ബോർഡ് പരിഷ്കരണങ്ങളോടുള്ള സമീപനവും ഇതിന് ഉദാഹരണമായി അദ്ദേഹം ചൂണ്ടിക്കാട്ടി. വഖഫ് ബോർഡിൽ അമുസ്‌ലിംകളെ ഉൾപ്പെടുത്താനുള്ള കേന്ദ്ര നീക്കത്തിനെതിരെ എൽ.ഡി.എഫ് കോടതിയെ സമീപിച്ചപ്പോൾ, യു.ഡി.എഫ് സർക്കാർ ബോർഡ് പിരിച്ചുവിടണമെന്നാണ് കോടതിയിൽ ആവശ്യപ്പെട്ടതെന്നും അദ്ദേഹം കുറ്റപ്പെടുത്തി.

കേന്ദ്രത്തിന്റെ പി.എം. ശ്രീ പദ്ധതിയുമായി ബന്ധപ്പെട്ട് എൽ.ഡി.എഫ് സ്വീകരിച്ച നിലപാടിൽനിന്ന് വ്യത്യസ്തമായ സമീപനമാണ് യു.ഡി.എഫ് സർക്കാറിന്റേതെന്നും അദ്ദേഹം വിമർശിച്ചു.

തിരുവനന്തപുരത്ത് യൂനിവേഴ്സിറ്റി ഹോസ്റ്റലിന് സമീപമുണ്ടായ സംഘർഷത്തിൽ പൊലീസിനും യൂത്ത് കോൺഗ്രസിനുമെതിരെ പിണറായി ഗുരുതര ആരോപണങ്ങൾ ഉന്നയിച്ചു. യൂത്ത് കോൺഗ്രസ് പ്രവർത്തകർ മനഃപൂർവം ഹോസ്റ്റൽ ലക്ഷ്യമിട്ടാണ് പ്രതിഷേധം നടത്തിയത്. ഹോസ്റ്റലിലേക്ക് തീപ്പന്തവും കല്ലുകളും എറിഞ്ഞപ്പോൾ ആക്രമണം തടയേണ്ട പൊലീസ് വിദ്യാർഥികളെ മർദിച്ചെന്നും എസ്.എഫ്.ഐ സംസ്ഥാന സെക്രട്ടറിയുൾപ്പെടെയുള്ളവർക്ക് പരിക്കേറ്റെന്നും പിണറായി പറഞ്ഞു.

പരിക്കേറ്റവരെ ആശുപത്രിയിലെത്തിക്കാൻ ശ്രമിച്ച ആംബുലൻസുകൾ യൂത്ത് കോൺഗ്രസ് പ്രവർത്തകർ തടഞ്ഞെന്നും അദ്ദേഹം ആരോപിച്ചു. അടിയന്തര സാഹചര്യത്തിൽ ഉത്തരവാദിത്വം നിർവഹിക്കുന്നതിൽ പൊലീസ് പരാജയപ്പെട്ടെന്നും യു.ഡി.എഫ് ഭരണത്തിൽ പൊലീസിന്റെ ഭാഗത്തുനിന്ന് ഗുരുതര വീഴ്ചയുണ്ടായെന്നും പ്രതിപക്ഷ നേതാവ് വിമർശിച്ചു.