പാക് വനിതാ ഏജന്റിന് രഹസ്യവിവരങ്ങൾ കൈമാറിയെന്ന് ആരോപണം; നാവികസേന ഉദ്യോഗസ്ഥൻ കോയമ്പത്തൂരിൽ അറസ്റ്റിൽ

കോയമ്പത്തൂർ: പാകിസ്താൻ രഹസ്യാന്വേഷണ ഏജന്റിന് തന്ത്രപ്രധാന വിവരങ്ങൾ ചോർത്തി നൽകിയ കേസിൽ ഇന്ത്യൻ നാവികസേന ഉദ്യോഗസ്ഥൻ അറസ്റ്റിൽ. പശ്ചിമ ബംഗാൾ സ്വദേശിയായ പ്രദീപ് മുഖർജിയാണ് ആന്ധ്രാപ്രദേശ് പൊലീസിന്റെ കൗണ്ടർ ഇന്റലിജൻസ് വിഭാഗത്തിന്റെ പിടിയിലായത്. കോയമ്പത്തൂർ റെഡ് ഫീൽഡ്സിലെ നാവികസേനാ പരിശീലന കേന്ദ്രമായ ഐ.എൻ.എസ് അഗ്രണിയിൽ മാനേജ്‌മെന്റ് ഡെവലപ്‌മെന്റ് കോഴ്‌‌സിന് എത്തിയപ്പോഴായിരുന്നു അറസ്റ്റ്.

സമൂഹമാധ്യമങ്ങൾ വഴി പരിചയപ്പെട്ട പാക് വനിതാ ഏജന്റിന് വിശാഖപട്ടണം നാവിക താവളവുമായി ബന്ധപ്പെട്ട വിവരങ്ങൾ കൈമാറിയെന്നാണ് കേസ്. യുദ്ധക്കപ്പലുകൾ, അന്തർവാഹിനികൾ എന്നിവയുടെ നീക്കങ്ങൾ, പ്രതിരോധ ആസ്തികൾ, സേനയുടെ തന്ത്രപ്രധാന പ്രവർത്തനങ്ങൾ തുടങ്ങിയ വിവരങ്ങളാണ് ഇയാൾ ചോർത്തി നൽകിയത്.

ഡിജിറ്റൽ തെളിവുകളുടെ അടിസ്ഥാനത്തിൽ കൗണ്ടർ ഇന്റലിജൻസ് വിഭാഗം ഇയാളെ നിരീക്ഷിച്ചു വരികയായിരുന്നു. ചാരവൃത്തി സ്ഥിരീകരിച്ചതിനെ തുടർന്ന് നാവികസേനാ അധികൃതരുടെ അനുമതിയോടെയാണ് അറസ്റ്റ് രേഖപ്പെടുത്തിയത്.

കൂടുതൽ ചോദ്യം ചെയ്യുന്നതിനായി പ്രതിയെ വിജയവാഡയിലെ കൗണ്ടർ ഇന്റലിജൻസ് ആസ്ഥാനത്തേക്ക് മാറ്റി. വിവരങ്ങൾ നൽകിയതിന് പ്രതിഫലമായി ഹവാല വഴിയോ ഡിജിറ്റൽ മാർഗ്ഗങ്ങളിലൂടെയോ പണം ലഭിച്ചിട്ടുണ്ടോ എന്ന് അന്വേഷണസംഘം പരിശോധിച്ചു വരികയാണ്.