വൈദ്യുതി തടസ്സം ജീവനെടുത്തു; ഓക്സിജൻ ലഭിക്കാതെ വയോധിക മരിച്ചു

കാഞ്ഞങ്ങാട്: അറ്റകുറ്റപ്പണിയുടെ പേരിൽ മണിക്കൂറുകളോളം വൈദ്യുതി മുടങ്ങിയതിനെ തുടർന്ന് ഓക്സിജൻ കിട്ടാതെ വയോധിക മരിച്ചു. അതിഞ്ഞാൽ കെ.കെ. പുരയിലെ മറിയം (75) ആണ് മരിച്ചത്. വൈദ്യുതി വകുപ്പ് അധികൃതരുടെ ഗുരുതര അനാസ്ഥയാണ് മരണത്തിന് കാരണമെന്ന് കാണിച്ച് നാട്ടുകാരും ബന്ധുക്കളും രംഗത്തെത്തി.

കൃത്രിമ ഓക്സിജന്റെ സഹായത്തോടെ ജീവൻ നിലനിർത്തിയിരുന്ന മറിയത്തിന് വെള്ളിയാഴ്ച ഉച്ചയ്ക്ക് രണ്ടു മണിയോടെ വൈദ്യുതി ബന്ധം വിച്ഛേദിച്ചതോടെയാണ് ദുരവസ്ഥയുണ്ടായത്. തുടർന്ന് വീട്ടിലെ ഇൻവെർട്ടർ ഉപയോഗിച്ചാണ് ഓക്സിജൻ ഉപകരണം പ്രവർത്തിപ്പിച്ചത്. എന്നാൽ, ആറര മണിക്കൂറിലേറെ വൈദ്യുതി മുടങ്ങിയതോടെ ഇൻവെർട്ടറിലെ ചാർജ് പൂർണ്ണമായി തീരുകയും ഓക്സിജൻ വിതരണം നിലയ്ക്കുകയുമായിരുന്നു.

രാത്രി 8.30 ഓടെയാണ് പ്രദേശത്ത് വൈദ്യുതി ബന്ധം പുനഃസ്ഥാപിച്ചത്. ഇതിനിടയിൽ പ്രദേശവാസികളും പൊതുപ്രവർത്തകരും പലതവണ വൈദ്യുതി വകുപ്പ് ഓഫീസുമായി ബന്ധപ്പെട്ടെങ്കിലും 'ഉടൻ പുനഃസ്ഥാപിക്കും' എന്ന പതിവു മറുപടിയാണ് ലഭിച്ചതെന്ന് നാട്ടുകാർ പറഞ്ഞു. വൈദ്യുതി വിതരണം വൈകിയതാണ് ജീവൻ പൊലിയാൻ കാരണമെന്നും കുറ്റക്കാരായ ഉദ്യോഗസ്ഥർക്കെതിരെ നടപടി സ്വീകരിക്കണമെന്നും നാട്ടുകാർ ആവശ്യപ്പെട്ടു.