സംസ്ഥാനത്ത് പനി ബാധിച്ച് ഒരു മരണം കൂടി; പകർച്ചപ്പനി വ്യാപനം തുടരുമ്പോഴും മരുന്ന് പ്രതിസന്ധിക്ക് അയവില്ലാതെ സർക്കാർ ആശുപത്രികൾ

തിരുവനന്തപുരം: സംസ്ഥാനത്ത് പകർച്ചപ്പനി വ്യാപനം കടുക്കുന്നതിനിടെ ഒരു മരണം കൂടി റിപ്പോർട്ട് ചെയ്തു. പാലക്കാട് മണ്ണാർക്കാട് കോട്ടോപ്പാടം വേങ്ങ സ്വദേശിനിയായ ശിവരഞ്ജിനി (14) ആണ് മരിച്ചത്. പനി കുറയാത്തതിനെ തുടർന്ന് വ്യാഴാഴ്ച രാത്രി എട്ടുമണിയോടെ മണ്ണാർക്കാട് താലൂക്ക് ആശുപത്രിയിൽ ചികിത്സ തേടിയ ശേഷം വീട്ടിലേക്ക് മടങ്ങിയ കുട്ടനിക്ക് രാത്രി 11ഓടെ വീണ്ടും അസ്വസ്ഥത അനുഭവപ്പെടുകയായിരുന്നു. ബോധരഹിതയായ കുട്ടിയെ ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

അതേസമയം, സംസ്ഥാനത്ത് പനി ബാധിതരുടെ എണ്ണത്തിലും മരണസംഖ്യയിലും വലിയ വർധനവാണ് ഉണ്ടാകുന്നത്. ഒറ്റ ദിവസം കൊണ്ട് ഒമ്പത് പനി മരണങ്ങളാണ് റിപ്പോർട്ട് ചെയ്തത്. കഴിഞ്ഞ ദിവസം മാത്രം 8407 പേർ വിവിധ സർക്കാർ ആശുപത്രികളിൽ പനിക്ക് ചികിത്സ തേടി. മലപ്പുറം ജില്ലയിലാണ് രോഗികളുടെ എണ്ണം ഏറ്റവും കൂടുതൽ — രണ്ടായിരത്തിലധികം പേരാണ് പ്രതിദിനം ചികിത്സ തേടുന്നത്. പാലക്കാട്, കാസർകോട്, തിരുവനന്തപുരം ജില്ലകളിലും സ്ഥിതി ഗുരുതരമാണ്. ഒറ്റപ്പാലത്ത് ഡെങ്കിപ്പനി ബാധിച്ചും ഒരാൾ മരിച്ചു. എറണാകുളത്ത് ഇൻഫ്ലുവൻസ ബാധിതരുടെ എണ്ണവും ഉയരുകയാണ്. ഇന്നലെ മാത്രം 48 പേർക്കാണ് ഇൻഫ്ലുവൻസ സ്ഥിരീകരിച്ചത്.

സർക്കാർ ആശുപത്രികളിൽ മരുന്ന് പ്രതിസന്ധി

പകർച്ചപ്പനി നിയന്ത്രണാതീതമായി തുടരുമ്പോഴും സർക്കാർ ആശുപത്രികളിലെ മരുന്ന് ക്ഷാമത്തിന് പരിഹാരമാകുന്നില്ല. വിതരണക്കാർക്ക് നൽകാനുള്ള കോടികളുടെ കുടിശ്ശിക കാരണം പല കമ്പനികളും പുതിയ പർച്ചേസ് ഓർഡർ പ്രകാരമുള്ള മരുന്നുകൾ നൽകാൻ തയ്യാറാകുന്നില്ലെന്നാണ് ആരോഗ്യവകുപ്പ് വ്യക്തമാക്കുന്നത്. പ്രതിസന്ധി പരിഹരിക്കാൻ 500 കോടി രൂപ അടിയന്തരമായി അനുവദിക്കണമെന്ന് ആരോഗ്യവകുപ്പ് ധനവകുപ്പിനോട് ആവശ്യപ്പെട്ടിട്ടുണ്ട്.

കേരള മെഡിക്കൽ സർവീസസ് കോർപ്പറേഷൻ (KMSCL) ബോർഡ് യോഗം പഞ്ഞി ഉൾപ്പെടെയുള്ള 9 അത്യന്താപേക്ഷിത ഇനങ്ങളുടെ റീ-ടെൻഡർ നടപടികൾക്ക് അംഗീകാരം നൽകിയിട്ടുണ്ടെങ്കിലും വിതരണം പുനഃസ്ഥാപിക്കാൻ കുറഞ്ഞത് രണ്ടു മാസമെങ്കിലും സമയമെടുക്കും. മറ്റ് സംസ്ഥാനങ്ങളിൽ നിന്ന് അടിയന്തരമായി സ്റ്റോക്ക് എത്തിക്കാനുള്ള ശ്രമങ്ങളും വൈകുകയാണ്. നിലവിലെ സാഹചര്യത്തിൽ നവംബർ വരെയെങ്കിലും ആശുപത്രികളിലെ മരുന്ന് ക്ഷാമം നീണ്ടുനിൽക്കുമെന്നാണ് സൂചന.