കെ.എം.ഷാജിയെ വഴിയില്‍ ഇറക്കിവിട്ട സംഭവം ; യുവമോര്‍ച്ച പ്രവര്‍ത്തകര്‍ക്കെതിരേ കേസെടുത്തു
Nazeema
സ്റ്റാഫ് റിപ്പോർട്ടർ
തിരുവനന്തപുരത്ത് തദ്ദേശ മന്ത്രി കെ.എം. ഷാജിയുടെ വാഹനം തടഞ്ഞ് വഴിയിൽ ഇറക്കിവിട്ട സംഭവത്തിൽ യുവമോർച്ച പ്രവർത്തകർക്കെതിരെ കന്റോൺമെന്റ് പൊലീസ് ജാമ്യമില്ലാ വകുപ്പുകൾ ചുമത്തി കേസെടുത്തു. മാരാർജി ഭവനുനേരെയുണ്ടായ ആക്രമണത്തിൽ പ്രതിഷേധിച്ച് നടന്ന സമരത്തിനിടെയായിരുന്നു സംഭവം.
തിരുവനന്തപുരം: തലസ്ഥാനത്ത് തദ്ദേശ വകുപ്പ് മന്ത്രി കെ.എം. ഷാജിയുടെ ഔദ്യോഗിക വാഹനം തടഞ്ഞ് വഴിയാധാരമാക്കിയ സംഭവത്തിൽ യുവമോർച്ച പ്രവർത്തകർക്കെതിരെ കന്റോൺമെന്റ് പൊലീസ് സ്വമേധയാ കേസെടുത്തു. കഴിഞ്ഞ ദിവസം ബേക്കർ ജങ്ഷനിൽ വെച്ചായിരുന്നു സംഭവം.
കെ.എം. ഷാജി കയറിയ വാഹനങ്ങളെല്ലാം യുവമോർച്ച പ്രവർത്തകർ തടഞ്ഞതോടെ മന്ത്രിക്ക് തെരുവിലൂടെ നടന്നുപോകേണ്ടി വന്നു. ഡി.സി.സി ഓഫീസിന് നേരെയുണ്ടായ ആക്രമണത്തിന് പിന്നാലെ ബി.ജെ.പി സംസ്ഥാന കമ്മിറ്റി ഓഫീസായ മാരാർജി ഭവനുനേരെ ബീയർ കുപ്പിയേറുണ്ടായിരുന്നു. ഇതിൽ പ്രതിഷേധിച്ച് യുവമോർച്ച നടത്തിയ പ്രകടനത്തിനിടെയാണ് മന്ത്രിയുടെ വാഹനം തടഞ്ഞത്.
ഔദ്യോഗിക വാഹനം തടഞ്ഞതോടെ മന്ത്രി ഓട്ടോറിക്ഷയിൽ യാത്ര തുടരാൻ ശ്രമിച്ചെങ്കിലും അതും പ്രവർത്തകർ തടഞ്ഞു. തുടർന്ന് ഏറെദൂരം നടന്നുപോയ ശേഷമാണ് അദ്ദേഹത്തിന് മറ്റൊരു വാഹനത്തിൽ കയറാനായത്. സംഭവം നടക്കുമ്പോൾ സ്ഥലത്ത് പൊലീസുണ്ടായിരുന്നില്ല. ജാമ്യമില്ലാ വകുപ്പുകൾ ചുമത്തിയാണ് കേസ് എടുത്തിട്ടുള്ളത്.
തലസ്ഥാനത്ത് അക്രമസംഭവങ്ങൾ തുടരുന്ന പശ്ചാത്തലത്തിൽ വിവിധ രാഷ്ട്രീയ പാർട്ടി ഓഫീസുകൾക്കും തെരുവുകൾക്കും കനത്ത സുരക്ഷ ഏർപ്പെടുത്തി. നഗരത്തിലെ ക്രമസമാധാന നില ഉറപ്പാക്കാൻ പൊലീസിന് ശക്തമായ നിർദേശം നൽകിയിട്ടുണ്ട്.
