അടൂർ പ്രകാശ് ദില്ലിയിൽ ഹൈക്കമാൻഡുമായി കൂടിക്കാഴ്ചക്ക് ശ്രമിക്കുന്നു, രാഹുലിനെയും ഗർഗെയെയും കാണും

ദില്ലി: മുഖ്യമന്ത്രി വി.ഡി. സതീശനെതിരായ പരാതിയിൽ നിന്ന് പിന്നോട്ടില്ലെന്ന് ഉറപ്പിച്ച് ദില്ലിയിലെത്തിയ അടൂർ പ്രകാശ് ഹൈക്കമാൻഡ് നേതൃത്വവുമായി കൂടിക്കാഴ്ചക്ക് ശ്രമിക്കുന്നു.നാടകീയ നീക്കങ്ങൾക്കൊടുവിൽ യു.ഡി.എഫ് കൺവീനർ അടൂർ പ്രകാശ് എം.പി ദില്ലിയിൽ. മുഖ്യമന്ത്രി വി.ഡി. സതീശനും പാർട്ടിക്കുമെതിരായ പരാതിയുമായി കോൺഗ്രസ് ദേശീയ നേതൃത്വത്തെ കാണാനാണ് അദ്ദേഹത്തിന്റെ നീക്കം. എന്നാൽ, കോൺഗ്രസ് അധ്യക്ഷൻ മല്ലികാർജുൻ ഖാർഗെ, രാഹുൽ ഗാന്ധി എന്നിവരെ കാണാൻ സമയം ചോദിച്ചെങ്കിലും ഇതുവരെ കൂടിക്കാഴ്ചക്ക് സമയം അനുവദിച്ചിട്ടില്ലെന്നാണ് വിവരം.

​മുഖ്യമന്ത്രിക്കെതിരായ പരാതിയിൽ ഉറച്ചുനിൽക്കുന്ന അടൂർ പ്രകാശ്, പാർട്ടിയും സർക്കാറും തമ്മിലുള്ള ഏകോപനമില്ലായ്മയും ഏകപക്ഷീയ തീരുമാനങ്ങളും ചൂണ്ടിക്കാട്ടി പ്രത്യേക പരാതി സമർപ്പിക്കാനാണ് ദില്ലിയിലെത്തിയിരിക്കുന്നത്.

​മുന്നണിയിലെ പ്രധാന കക്ഷിയായ മുസ്ലിം ലീഗിന്റെ നേതാവ് എം.കെ. മുനീറിനെ അഡ്മിനിസ്ട്രേറ്റീവ് റിഫോംസ് കമ്മീഷൻ ചെയർമാനാക്കിയതും, ഫോർവേഡ് ബ്ലോക്ക് നേതാവ് ജി. ദേവരാജനെ ദില്ലിയിലെ സർക്കാറിന്റെ പ്രത്യേക പ്രതിനിധിയായി നിയമിച്ചതും മുന്നണിയിൽ ചർച്ച ചെയ്യാതെയാണെന്നാണ് പ്രധാന ആക്ഷേപം. സർക്കാർ തലത്തിലെ സുപ്രധാന തീരുമാനങ്ങൾ മുന്നണി കൺവീനറായ താൻ മാധ്യമങ്ങളിലൂടെയാണ് അറിയുന്നതെന്ന് വാർത്താസമ്മേളനത്തിൽ അടൂർ പ്രകാശ് പരസ്യമായി കുറ്റപ്പെടുത്തിയിരുന്നു.

​കഴിഞ്ഞ ജൂലൈക്ക് ശേഷം യു.ഡി.എഫ് ഏകോപന സമിതി യോഗങ്ങൾ കൃത്യമായി വിളിച്ചുചേർക്കാൻ മുഖ്യമന്ത്രി തയ്യാറായിട്ടില്ലെന്നും അടൂർ പ്രകാശ് ആരോപിക്കുന്നു. ഹൈക്കമാൻഡ് ഇടപെടൽ അനിവാര്യമാണെന്ന നിലപാടിലാണ് അദ്ദേഹം.