ദുബായ്, ലണ്ടൻ, ന്യൂയോർക്ക്, സിംഗപ്പൂർ, ടോക്യോ നഗരങ്ങളിൽ 'കേരള ഡെസ്‌കുകൾ'; ആഗോള നിക്ഷേപം കേരളത്തിലേക്കെന്ന് സർക്കാർ

തിരുവനന്തപുരം: വിദേശ നിക്ഷേപങ്ങൾ സമാഹരിക്കുന്നതിനും പ്രവാസി മലയാളി ശൃംഖലകളെ കൃത്യമായി പ്രയോജനപ്പെടുത്തുന്നതിനുമായി പ്രമുഖ ആഗോള നഗരങ്ങളിൽ 'കേരള ഡെസ്‌കുകൾ' സ്ഥാപിക്കാൻ സംസ്ഥാന സർക്കാർ അനുമതി നൽകി. സർക്കാരിന്റെ നൂറുദിന കർമ്മപദ്ധതിയുടെ ഭാഗമായി വ്യവസായ വകുപ്പാണ് ഇത് സംബന്ധിച്ച ഉത്തരവിറക്കിയത്. ആദ്യഘട്ടത്തിൽ ദുബായ്, ലണ്ടൻ, ന്യൂയോർക്ക്, സിംഗപ്പൂർ, ടോക്യോ എന്നീ അഞ്ച് പ്രമുഖ നഗരങ്ങളിലാണ് ഡെസ്‌കുകൾ പ്രവർത്തിക്കുക.

പ്രവാസികളിൽ നിന്നുള്ള പിന്തുണ കേവലം പണമയക്കലിൽ മാത്രം ഒതുക്കാതെ, സംസ്ഥാനത്ത് നിക്ഷേപ അധിഷ്ഠിത വളർച്ച പ്രോത്സാഹിപ്പിക്കുകയാണ് ഇതിലൂടെ ലക്ഷ്യമിടുന്നത്. സർക്കാരിന് സാമ്പത്തിക ബാധ്യതയില്ലാത്ത രീതിയിലാണ് പദ്ധതി രൂപകൽപ്പന ചെയ്തിരിക്കുന്നത്.

അതത് നഗരങ്ങളിലെ അംഗീകൃത പ്രവാസി സംഘടനകളുടെ സഹകരണത്തോടെ സന്നദ്ധാടിസ്ഥാനത്തിലായിരിക്കും ഇവയുടെ പ്രവർത്തനം. ഈ ഡെസ്‌കുകൾ വഴി ലഭിക്കുന്ന നിക്ഷേപ നിർദേശങ്ങൾ കെ.എസ്.ഐ.ഡി.സി.യുടെ (KSIDC) 'ഇൻവെസ്റ്റ് കേരള സെൽ' വഴി സിംഗിൾ വിൻഡോ സംവിധാനത്തിലൂടെ വേഗത്തിൽ യാഥാർഥ്യമാക്കും. പ്രവാസി വ്യവസായികളെയും പുതിയ നിക്ഷേപകരെയും ഏകോപിപ്പിച്ച് സംസ്ഥാനത്തെ വ്യവസായ മേഖലയിൽ വൻ കുതിച്ചുചാട്ടം സൃഷ്ടിക്കാൻ ഈ നീക്കം ഉപകരിക്കുമെന്നാണ് പ്രതീക്ഷിക്കുന്നത്.