മുട്ടിൽ മരംമുറിക്കേസ് അട്ടിമറി: അന്വേഷണം ഉന്നത ഉദ്യോഗസ്ഥരിലേക്കും? ജയതിലകിന്റെ ഉത്തരവ് ഇറങ്ങിയ സാഹചര്യം അന്വേഷിക്കുമെന്ന് മന്ത്രി
Nazeema
സ്റ്റാഫ് റിപ്പോർട്ടർ
മുട്ടിൽ മരംമുറിക്കേസിലെ ഗൂഢാലോചനയും ഉദ്യോഗസ്ഥരുടെ വീഴ്ചകളും അന്വേഷിക്കുമെന്ന് മന്ത്രി ഷിബു ബേബി ജോൺ വ്യക്തമാക്കി. മുൻ റവന്യൂ സെക്രട്ടറിയുടെ ഉത്തരവിറങ്ങിയ സാഹചര്യവും കുറ്റപത്രത്തിലെ പിഴവുകളും പരിശോധിക്കും. കെഎഎസ്ഇ ഡയറക്ടർ സ്ഥാനത്ത് നിന്നുള്ള ടോം ജോസഫിന്റെ പിന്മാറ്റവും മന്ത്രി സ്ഥിരീകരിച്ചു.
കണ്ണൂർ: മുട്ടിൽ മരംമുറിക്കേസിന് പിന്നിലെ ഗൂഢാലോചനയും ഉദ്യോഗസ്ഥരുടെ വീഴ്ചകളും സമഗ്രമായി അന്വേഷിക്കുമെന്ന് മന്ത്രി ഷിബു ബേബി ജോൺ. കേസിൽ മുൻ റവന്യൂ സെക്രട്ടറി ഡോ. എ. ജയതിലകിന്റെ വിവാദ ഉത്തരവ് പുറത്തിറങ്ങിയ സാഹചര്യവും തിടുക്കപ്പെട്ട് സമർപ്പിച്ച കുറ്റപത്രത്തിലെ ഗുരുതരമായ വീഴ്ചകളും പരിശോധിക്കുമെന്നും അദ്ദേഹം വ്യക്തമാക്കി.
അതിനിടെ, വിവാദങ്ങളെത്തുടർന്ന് കെ.എ.എസ്.ഇ (KASE) ഡയറക്ടർ സ്ഥാനത്തുനിന്നും ടോം ജോസഫ് പിന്മാറിയതായും മന്ത്രി സ്ഥിരീകരിച്ചു.
കുറ്റപത്രത്തിലെ പോരായ്മകൾ പരിഹരിച്ച് തിരുത്തലുകളോടെ കേസ് വീണ്ടും കോടതിയിൽ സമർപ്പിച്ചിട്ടുണ്ട്. കേസുമായി ബന്ധപ്പെട്ട് മുൻ പ്രോസിക്യൂട്ടർ നടത്തിയ വെളിപ്പെടുത്തലുകളും ഉന്നയിക്കപ്പെട്ട ആരോപണങ്ങളും ഗൗരവമായി പരിശോധിക്കും. ദുരൂഹതകൾ നിറഞ്ഞ സാഹചര്യമാണ് കേസിലുള്ളത്. അന്ന് റവന്യൂ സെക്രട്ടറിയായിരുന്ന ഡോ. ജയതിലക് ഉത്തരവിറക്കിയ പശ്ചാത്തലം അന്വേഷിക്കണമെന്ന് ആവശ്യപ്പെട്ട് ആഭ്യന്തരമന്ത്രിക്ക് കത്ത് നൽകിയിട്ടുണ്ടെന്നും അദ്ദേഹം കൂട്ടിച്ചേർത്തു.
ചാനൽ ഓഫീസിലെ ഗൂഢാലോചന: ഇ-മെയിൽ പരാതി
കേസിലെ പ്രതികൾ പ്രമുഖ ചാനൽ ഓഫീസിൽ വെച്ച് ഗൂഢാലോചന നടത്തിയതായും ഇതിന് മറ്റൊരു മാധ്യമപ്രവർത്തകൻ സാക്ഷിയാണെന്നും ചൂണ്ടിക്കാട്ടി തനിക്ക് ഇ-മെയിൽ പരാതി ലഭിച്ചിട്ടുണ്ടെന്ന് മന്ത്രി വെളിപ്പെടുത്തി. ഇതിന് പിന്നിലെ യഥാർത്ഥ വസ്തുത പുറത്തുകൊണ്ടുവരണം.
മുട്ടിൽ മരംമുറിയിൽ ഉദ്യോഗസ്ഥ തലത്തിൽ വൻ വീഴ്ച സംഭവിച്ചിട്ടുണ്ട്. മുൻ സർക്കാർ പ്രതികൾക്ക് നിയമത്തിൽ നിന്ന് ഊരിപ്പോകാൻ വഴിയൊരുക്കിയോ എന്ന് സംശയിക്കേണ്ടിയിരിക്കുന്നു. കുറ്റപത്രത്തിൽ വീഴ്ച വരുത്തിയത് ബോധപൂർവമാണോ എന്ന് അന്വേഷിച്ച് അടിയന്തരമായി റിപ്പോർട്ട് സമർപ്പിക്കാൻ നിർദ്ദേശം നൽകിയിട്ടുണ്ട്. ഭീഷണികൾക്ക് വഴങ്ങി രാഷ്ട്രീയ പ്രവർത്തനം നടത്താനാകില്ലെന്നും അദ്ദേഹം പറഞ്ഞു.
ടോം ജോസഫിന്റെ പിന്മാറ്റം
കെ.എ.എസ്.ഇ ഡയറക്ടറായി നിയമിക്കാൻ തീരുമാനിച്ചിരുന്ന ടോം ജോസഫിനെതിരെയുള്ള വാർത്തകളുടെ സത്യവസ്ഥ അന്വേഷിക്കാൻ എ.ഡി.ജി.പിയോട് ആവശ്യപ്പെട്ടിരുന്നു. ഇതിന് പിന്നാലെയാണ് അദ്ദേഹം സ്വമേധയാ സ്ഥാനമൊഴിയാൻ സന്നദ്ധത അറിയിച്ചത്. താൻ മുൻപ് മന്ത്രിയായിരുന്ന കാലത്തും സ്വകാര്യ വാഹനങ്ങൾ ഉപയോഗിച്ചിട്ടുണ്ടെന്നും ടോം ജോസഫിനെതിരെ കേസുള്ള വിവരം തനിക്ക് അറിവില്ലായിരുന്നുവെന്നും മന്ത്രി വ്യക്തമാക്കി.
ചില മാധ്യമങ്ങൾ നടത്തുന്ന വാസ്തവവിരുദ്ധമായ പ്രചാരണങ്ങൾ ബ്ലാക്ക് മെയിലിംഗ് ജേർണലിസത്തിന്റെ ഭാഗമാണ്. ഇത്തരം ഭീഷണികളെ ഭയപ്പെടില്ലെന്നും മന്ത്രി കണ്ണൂരിൽ പറഞ്ഞു.
ആറളത്ത് ആനയെ പിടികൂടാൻ ശ്രമം തുടരുന്നു
കണ്ണൂർ ആറളത്തെ ജനവാസ മേഖലയിലിറങ്ങി ഭീതി സൃഷ്ടിക്കുന്ന 'കെ.എം-1' എന്ന കാട്ടാനയെ പിടികൂടാനുള്ള വനംവകുപ്പിന്റെ ശ്രമങ്ങൾ ഊർജിതമായി തുടരുകയാണെന്നും മന്ത്രി അറിയിച്ചു.
