എസ്എഫ്ഐ നേതാവിന്റെ പരാതിയിൽ നടപടി; കന്റോൺമെന്റ് എസ്ഐക്കെതിരായ റിപ്പോർട്ട് കൈമാറി

തിരുവനന്തപുരം: യൂണിവേഴ്സിറ്റി ഹോസ്റ്റൽ സംഘർഷത്തിനിടെ എസ്എഫ്ഐ ജില്ലാ സെക്രട്ടറി നന്ദനെ കന്റോൺമെന്റ് എസ്ഐ ഗോകുൽ ഗോപാൽ ഫോണിലൂടെ ഭീഷണിപ്പെടുത്തിയെന്ന പരാതിയിൽ അന്വേഷണ റിപ്പോർട്ട് സിറ്റി പൊലീസ് കമ്മീഷണർക്ക് സമർപ്പിച്ചു. സ്പെഷ്യൽ ബ്രാഞ്ച് അസിസ്റ്റന്റ് കമ്മീഷണറാണ് അന്വേഷണം നടത്തി റിപ്പോർട്ട് തയ്യാറാക്കിയത്.

റിപ്പോർട്ടിലെ കണ്ടെത്തലുകൾ പരിശോധിച്ച ശേഷമായിരിക്കും എസ്ഐക്കെതിരെ വകുപ്പുതല നടപടി സ്വീകരിക്കുന്നത് ഉൾപ്പെടെയുള്ള കാര്യങ്ങളിൽ തീരുമാനമെടുക്കുക.

കഴിഞ്ഞ ദിവസം എസ്ഐയും എസ്എഫ്ഐ നേതാവും തമ്മിലുള്ള ഫോൺ സംഭാഷണത്തിന്റെ ശബ്ദരേഖ പുറത്തുവന്നിരുന്നു. ഇതിന് പിന്നാലെയാണ് എസ്എഫ്ഐ സംസ്ഥാന നേതൃത്വം ഡിജിപിക്ക് പരാതി നൽകിയത്. യൂണിവേഴ്സിറ്റി ഹോസ്റ്റൽ സംഘർഷത്തിനിടെ വിദ്യാർഥികൾക്ക് നേരെ പൊലീസ് നടത്തിയ ലാത്തിച്ചാർജും അതിനുശേഷമുള്ള എസ്ഐയുടെ ഭീഷണി സന്ദേശവും വലിയ വിവാദത്തിന് വഴിവെച്ചിരുന്നു.

കൂടാതെ, വിഷയത്തിൽ കന്റോൺമെന്റ് സിഐ പങ്കുവെച്ച ഫെയ്സ്ബുക്ക് കുറിപ്പും പ്രതിഷേധത്തിനിടയാക്കിയിരുന്നു. കുറ്റക്കാരായ പൊലീസ് ഉദ്യോഗസ്ഥർക്കെതിരെ നടപടി സ്വീകരിക്കണമെന്നാവശ്യപ്പെട്ട് എസ്എഫ്ഐ പ്രദേശത്ത് ശക്തമായ പ്രതിഷേധം സംഘടിപ്പിച്ചിരുന്നു.