ബിജെപി കൗൺസിലർ ആർ സുഗതന്‍റെ പേരിലെ വ്യാജ ഒപ്പ് ആരോപണം; പൊലീസ് ഇന്ന് കേസെടുക്കും

തിരുവനന്തപുരം: കാപ്പ കേസിൽ ജയിലിലായ ബി.ജെ.പി കൗൺസിലർ ആർ. സുഗതൻ ഹാജർ പുസ്തകത്തിൽ വ്യാജ ഒപ്പിട്ടെന്ന ആരോപണത്തിൽ പോലീസ് ഇന്ന് കേസെടുക്കും. രേഖകളുടെ ശാസ്ത്രീയ ഫോറൻസിക് പരിശോധന സാധ്യമാക്കുന്നതിനായി ആരെയും പ്രതി ചേർക്കാതെയാകും എഫ്.ഐ.ആർ രജിസ്റ്റർ ചെയ്യുക.

കാപ്പ ചുമത്തപ്പെട്ടതിനെ തുടർന്ന് സുഗതൻ ഒളിവിൽ കഴിഞ്ഞിരുന്ന ഫെബ്രുവരി 26, മാർച്ച് 11, ഏപ്രിൽ 27 തീയതികളിൽ നടന്ന നഗരസഭാ കൗൺസിൽ യോഗങ്ങളിൽ അദ്ദേഹം പങ്കെടുത്തതായി ഹാജർ രജിസ്റ്ററിൽ ഒപ്പിട്ടിട്ടുണ്ടെന്നാണ് എൽ.ഡി.എഫ് ആരോപിക്കുന്നത്. വിഷയം ഏറ്റെടുത്ത കോൺഗ്രസും ശക്തമായ പ്രതിഷേധവുമായി രംഗത്തുണ്ട്.

എന്നാൽ ആരോപണങ്ങൾ പൂർണ്ണമായും തള്ളിക്കളയുകയാണ് ബി.ജെ.പി. ലഭിച്ച പരാതിയുടെ അടിസ്ഥാനത്തിൽ യോഗ ദിവസങ്ങളിലെ സി.സി.ടി.വി ദൃശ്യങ്ങൾ പരിശോധിച്ച് നഗരസഭാ ഉദ്യോഗസ്ഥരുടെ മൊഴിയെടുക്കാനാണ് പോലീസിന്റെ തീരുമാനം.

ഹാജർ പുസ്തകം സൂക്ഷിക്കുന്നത് മേയറുടെ ഓഫീസിലായതിനാൽ, ആരോപണം തെളിയിക്കപ്പെട്ടാൽ കൗൺസിലർക്ക് പുറമെ മേയർക്കും അത് വലിയ തിരിച്ചടിയാകും.