യാത്രക്കാർക്ക് ആശ്വാസം; മലബാറിലും മാവേലിയിലും അധിക കോച്ചുകൾ അനുവദിച്ച് റെയിൽവേ

​തിരുവനന്തപുരം: മലബാർ മേഖലയിലേക്കുള്ള യാത്രക്കാരുടെ തിരക്ക് പരിഹരിക്കുന്നതിനായി മാവേലി, മലബാർ എക്സ്പ്രസ് ട്രെയിനുകളിൽ സ്ഥിരമായി അധിക കോച്ചുകൾ അനുവദിച്ച് റെയിൽവേ. ഇരു ട്രെയിനുകളിലും ഓരോ സ്ലീപ്പർ ക്ലാസ് കോച്ചുകൾ വീതമാണ് പുതുതായി ഉൾപ്പെടുത്തിയത്.

​മംഗളൂരു സെൻട്രൽ - തിരുവനന്തപുരം സെൻട്രൽ മാവേലി എക്സ്പ്രസിൽ (16603) സെപ്റ്റംബർ 30 മുതലും, തിരുവനന്തപുരം - മംഗളൂരു മാവേലി എക്സ്പ്രസിൽ (16604) ഒക്ടോബർ ഒന്ന് മുതലും പുതിയ സ്ലീപ്പർ കോച്ച് പ്രാബല്യത്തിൽ വരും. ഇതോടെ മാവേലി എക്സ്പ്രസിലെ ആകെ സ്ലീപ്പർ കോച്ചുകളുടെ എണ്ണം 10 ആയി ഉയർന്നു.

​ഒരു എസി ഫസ്റ്റ് ക്ലാസ് കം ടൂ ടയർ, ഒരു എസി ടൂ ടയർ, അഞ്ച് എസി ത്രീ ടയർ, അഞ്ച് ജനറൽ സെക്കൻഡ് ക്ലാസ്, ഭിന്നശേഷിക്കാർക്കായുള്ള രണ്ട് സെക്കൻഡ് ക്ലാസ് കോച്ചുകൾ എന്നിവയാണ് മാവേലിയിലുള്ള മറ്റ് കോച്ചുകൾ.

​16630 മംഗളൂരു - തിരുവനന്തപുരം മലബാർ എക്സ്പ്രസിൽ സെപ്റ്റംബർ 28 മുതലും, 16629 തിരുവനന്തപുരം - മംഗളൂരു എക്സ്പ്രസിൽ സെപ്റ്റംബർ 29 മുതലും അധിക സ്ലീപ്പർ കോച്ച് സർവീസ് ആരംഭിച്ചിട്ടുണ്ട്. ഇതോടെ മലബാർ എക്സ്പ്രസിലും സ്ലീപ്പർ കോച്ചുകളുടെ എണ്ണം 10 ആയി.