സതീശൻ സർക്കാരിൻ്റെ ആദ്യ ബലപരീക്ഷണത്തിൽ യുഡിഎഫിന് ക്ഷീണം, സിറ്റിംഗ് സീറ്റുകളിൽ നഷ്ടം, ഭൂരിപക്ഷത്തിൽ ഇടിവ്, ചിറയിൻകീഴ് തമ്മിലടി പ്രഹരം; എൽഡിഎഫിന് നേട്ടം

തിരുവനന്തപുരം: സതീശൻ സർക്കാർ അധികാരത്തിലേറിയ ശേഷമുള്ള ആദ്യ ബലപരീക്ഷണത്തിൽ യു.ഡി.എഫിന് തിരിച്ചടി. സംസ്ഥാനത്ത് 38 തദ്ദേശ വാർഡുകളിലേക്ക് നടന്ന ഉപതെരഞ്ഞെടുപ്പിൽ യു.ഡി.എഫിന്റെ സിറ്റിങ് സീറ്റുകളിലും ഭൂരിപക്ഷത്തിലും വൻ ഇടിവ് രേഖപ്പെടുത്തി. 22 സിറ്റിങ് സീറ്റുകളുമായി പോരാട്ടത്തിനിറങ്ങിയ മുന്നണിക്ക് മൂന്ന് സീറ്റുകൾ നഷ്ടമായി 19 എണ്ണത്തിലേക്ക് ഒതുങ്ങേണ്ടി വന്നു. അതേസമയം, 15 സീറ്റുകളുണ്ടായിരുന്ന എൽ.ഡി.എഫ് നില മെച്ചപ്പെടുത്തി 18 ഇടത്ത് വിജയക്കൊടി നാട്ടി. ഒരു സീറ്റിൽ ട്വന്റി 20യാണ് വിജയിച്ചത്.

യു.ഡി.എഫ് വിജയിച്ച ഭൂരിഭാഗം വാർഡുകളിലും ഭൂരിപക്ഷം കുത്തനെ ഇടിഞ്ഞതിന് പുറമെ പ്രധാനപ്പെട്ട ചില സിറ്റിങ് സീറ്റുകൾ കൈവിട്ടുപോവുകയും ചെയ്തു. തിരുവനന്തപുരം ജില്ലയിലെ ചിറയിൻകീഴ് നിയമസഭാ മണ്ഡലത്തിലേറ്റ തിരിച്ചടിയാണ് ഇതിൽ ഏറ്റവും ശ്രദ്ധേയം. രമ്യ ഹരിദാസ് എം.എൽ.എ ഉൾപ്പെടെയുള്ളവർ ഉൾപ്പെട്ട ഉൾപാർട്ടി തമ്മിലടിയും കയ്യാങ്കളിയുമാണ് ഇവിടെ യു.ഡി.എഫിന് പ്രഹരമായത്. രണ്ടു പ്രധാന സീറ്റുകളാണ് ഇവിടെ എൽ.ഡി.എഫ് പിടിച്ചെടുത്തത്. തിരുവനന്തപുരം ജില്ലാ പഞ്ചായത്തിലെ മംഗലപുരം മുണ്ടയ്ക്കൽ വാർഡ് 139 വോട്ടിനും അഞ്ചുതെങ്ങ് ഡിവിഷൻ ബ്ലോക്ക് പഞ്ചായത്ത് വാർഡുമാണ് എൽ.ഡി.എഫ് സ്വന്തമാക്കിയത്. ഇതോടെ മംഗലപുരം പഞ്ചായത്തിൽ എൽ.ഡി.എഫിന് കേവലഭൂരിപക്ഷമായി.

പാലക്കാട് ജില്ലയിലും യു.ഡി.എഫിന് കനത്ത തിരിച്ചടിയേറ്റു. ഇവിടെ രണ്ട് സീറ്റുകൾ എൽ.ഡി.എഫ് പിടിച്ചെടുത്തപ്പോൾ യു.ഡി.എഫിന് ഒരു സീറ്റ് മാത്രമാണ് നേടാനായത്. സുമേഷ് അച്യുതൻ എം.എൽ.എ ഒഴിഞ്ഞ ചിറ്റൂർ പരുത്തിക്കാവ് വാർഡിൽ ഇരുമുന്നണികളും ഒപ്പത്തിനൊപ്പമെത്തിയതിനെ തുടർന്ന് നറുക്കെടുപ്പിലൂടെയാണ് എൽ.ഡി.എഫ് വിജയിച്ചത്. ചിറ്റൂരിലെ തോൽവി അപ്രതീക്ഷിതമാണെന്നും കാരണം പരിശോധിക്കുമെന്നും സുമേഷ് അച്യുതൻ പ്രതികരിച്ചു. ആലത്തൂരിലും എൽ.ഡി.എഫ് വിജയം കണ്ടപ്പോൾ, ശ്രീകൃഷ്ണപുരം ഗ്രാമപഞ്ചായത്തിലെ രാഗം കോർണർ വാർഡ് 48 വോട്ടിന്റെ ഭൂരിപക്ഷത്തിൽ യു.ഡി.എഫിലെ പി. ഗിരീശൻ പിടിച്ചെടുത്തു.

എം.എൽ.എമാരായ ഫാത്തിമ തഹ്‌ലിയ, ഉഷ വിജയൻ എന്നിവർ രാജിവെച്ചതിനെ തുടർന്ന് ഉപതെരഞ്ഞെടുപ്പ് നടന്ന സീറ്റുകൾ യു.ഡി.എഫ് നിലനിർത്തിയെങ്കിലും ഭൂരിപക്ഷത്തിൽ വലിയ തോതിൽ ഇടിവുണ്ടായി. വയനാട് മാനന്തവാടി ബ്ലോക്ക് പഞ്ചായത്ത് പള്ളിക്കൽ ഡിവിഷനിൽ ഉഷ വിജയൻ എം.എൽ.എ കഴിഞ്ഞ തവണ നേടിയ 1055 വോട്ടിന്റെ ഭൂരിപക്ഷം ഇത്തവണ 331 ആയി കുറഞ്ഞു. കോഴിക്കോട് കോർപ്പറേഷനിലെ കുറ്റിച്ചിറ വാർഡിൽ ലീഗിലെ ഫർസീന അറക്കൽ 436 വോട്ടിന് ജയിച്ചെങ്കിലും മുൻപ് ഫാത്തിമ തഹ്‌ലിയ നേടിയ 2273 വോട്ടിന്റെ ഭൂരിപക്ഷത്തിന്റെ നാലിലൊന്നായി ഇത് ചുരുങ്ങി. എന്നാൽ, കോഴിക്കോട് മുട്ടം പഞ്ചായത്ത് ഒമ്പതാം വാർഡ് എൽ.ഡി.എഫിൽ നിന്ന് യു.ഡി.എഫ് പിടിച്ചെടുത്തു.

തൃശ്ശൂർ, പത്തനംതിട്ട ജില്ലകളിൽ യു.ഡി.എഫ് മുന്നേറ്റമുണ്ടാക്കി. തൃശ്ശൂരിൽ ഉപതെരഞ്ഞെടുപ്പ് നടന്ന അഞ്ചിൽ മൂന്ന് സീറ്റിലും യു.ഡി.എഫ് ജയിച്ചു. ചേലക്കര കുറുമല വാർഡ് 73 വോട്ടിന് എൽ.ഡി.എഫിൽ നിന്ന് പിടിച്ചെടുത്തതോടെ പഞ്ചായത്ത് ഭരണം യു.ഡി.എഫ് (13 സീറ്റ്) ഉറപ്പിച്ചു. ചാലക്കുടി നഗരസഭ 24-ാം വാർഡും വടക്കാഞ്ചേരി ബ്ലോക്ക് പഞ്ചായത്തിലെ തളി ഡിവിഷനും യു.ഡി.എഫ് നിലനിർത്തി. പത്തനംതിട്ടയിൽ ഉപതെരഞ്ഞെടുപ്പ് നടന്ന നാല് സീറ്റുകളിലും (കുറ്റൂർ ഓതറ, കുന്നന്താനം വള്ളോകുന്നു, റാന്നി ബ്ലോക്ക്പടി, അരുവാപ്പുലം കല്ലേലി) യു.ഡി.എഫ് വിജയിച്ചു. ഇതിൽ കുന്നന്താനം വാർഡ് 2 വോട്ടിന് എൽ.ഡി.എഫിൽ നിന്ന് പിടിച്ചെടുത്തതോടെ പഞ്ചായത്ത് ഭരണവും യു.ഡി.എഫിന് ലഭിച്ചു.

എറണാകുളത്ത് നാലിടത്തും സിറ്റിങ് സീറ്റുകൾ അതത് മുന്നണികൾ നിലനിർത്തി. കൊച്ചി കോർപ്പറേഷനിലെ അയ്യപ്പൻകാവ് ഡിവിഷനും വടക്കേക്കര പഞ്ചായത്തിലെ ഒൻപതാം വാർഡും യു.ഡി.എഫും, പാറക്കടവ് പുളിയനത്ത് എൽ.ഡി.എഫും വിജയിച്ചു. വടക്കേക്കരയിൽ യു.ഡി.എഫിലെ ജോസ് കുനിയന്തോടത്ത് 140 വോട്ടിനാണ് ജയിച്ചത്. പൂതൃക്കയിൽ ട്വന്റി 20 വിജയിച്ചതോടെ പഞ്ചായത്തിൽ കോൺഗ്രസ്-ട്വന്റി 20 കക്ഷിനില സമനിലയിലായി (7 വീതം).

മലപ്പുറം ജില്ലയിൽ വേങ്ങര, താനാളൂർ വാർഡുകൾ യു.ഡി.എഫും മങ്കട, കാലടി വാർഡുകൾ എൽ.ഡി.എഫും നിലനിർത്തി. എന്നാൽ കാലടി 12-ാം വാർഡിൽ കോൺഗ്രസ് സ്ഥാനാർത്ഥി മൂന്നാം സ്ഥാനത്തേക്ക് തള്ളപ്പെടുകയും ബി.ജെ.പി രണ്ടാമതെത്തുകയും ചെയ്തത് ശ്രദ്ധേയമായി.

കോട്ടയം പാമ്പാടി പഞ്ചായത്തിലെ കുമ്പന്താനം വാർഡിൽ കോൺഗ്രസിന്റെ സിറ്റിങ് സീറ്റ് സി.പി.എമ്മിലെ സണ്ണി വർഗീസ് 66 വോട്ടിന് പിടിച്ചെടുത്തു. കണ്ണൂർ പെരളശ്ശേരി പഞ്ചായത്തിലെ ആറാം വാർഡും യു.ഡി.എഫിൽ നിന്ന് എൽ.ഡി.എഫ് പിടിച്ചെടുത്തു.