പ്രിയദര്‍ശിനി സര്‍വീസ്‌ ഹിറ്റ്‌ ജില്ലയില്‍ കെ.എസ്‌.ആര്‍.ടി.സിക്ക്‌ യാത്രക്കാര്‍ വര്‍ധിച്ചു

ആലപ്പുഴ: സ്ത്രീകൾക്കും ട്രാൻസ്ജെൻഡർ വിഭാഗങ്ങൾക്കും കെ.എസ്.ആർ.ടി.സി ഓർഡിനറി ബസുകളിൽ സൗജന്യ യാത്ര അനുവദിക്കുന്ന 'പ്രിയദർശിനി' പദ്ധതി ജില്ലയിൽ വൻ വിജയം. പദ്ധതി ആരംഭിച്ച് 100 ദിവസം പിന്നിടുമ്പോൾ യാത്രക്കാരുടെ എണ്ണത്തിലും വരുമാനത്തിലും ശ്രദ്ധേയമായ വർധനയാണ് ആലപ്പുഴയിലെ വിവിധ ഡിപ്പോകളിൽ രേഖപ്പെടുത്തിയത്. സംസ്ഥാനത്താകെ ഇതുവരെ 13 കോടിയോളം സൗജന്യ യാത്രകൾ നടന്നു. പ്രതിദിനം ശരാശരി 12.93 ലക്ഷം വനിതകളാണ് പദ്ധതി പ്രയോജനപ്പെടുത്തുന്നത്.

ആലപ്പുഴ, ചെങ്ങന്നൂർ, ഹരിപ്പാട്, കായംകുളം, മാവേലിക്കര, ചേർത്തല, എടത്വ എന്നീ ഡിപ്പോകളിലെ സർവീസുകളിലാണ് യാത്രക്കാരുടെ ഗണ്യമായ വർധന. മുമ്പ് തിരക്കില്ലാതിരുന്ന രാവിലെയും വൈകുന്നേരവുമുള്ള സർവീസുകൾ ഇപ്പോൾ പൂർണമായും നിറഞ്ഞാണ് ഓടുന്നത്. സൗജന്യ യാത്രക്കാർ വർധിച്ചപ്പോഴും ടിക്കറ്റെടുക്കുന്ന പുരുഷ യാത്രക്കാരുടെ എണ്ണത്തിൽ കുറവുണ്ടായിട്ടില്ലെന്നതും ശ്രദ്ധേയമാണ്.

വിവിധ ഡിപ്പോകളിലെ പ്രാഥമിക വിലയിരുത്തൽ പ്രകാരം ചില ഓർഡിനറി സർവീസുകളിൽ പ്രതിദിന വരുമാനത്തിൽ 1000 മുതൽ 3000 രൂപ വരെ അധിക വർധനയുണ്ടായിട്ടുണ്ട്. സൗജന്യ യാത്രക്കാർക്ക് നൽകുന്ന 'സീറോ-വാല്യൂ' ടിക്കറ്റുകൾ വഴി കൃത്യമായ യാത്രാക്കണക്കുകൾ ലഭ്യമാകുന്നത് സർവീസുകൾ കാര്യക്ഷമമായി പുനഃക്രമീകരിക്കാൻ സഹായിക്കുന്നുണ്ട്.

ബസുകളുടെ ക്ഷാമം തിരിച്ചടിയാകുന്നു

അതേസമയം, യാത്രക്കാരുടെ വർധനയ്ക്കനുസരിച്ച് സർവീസ് നടത്താൻ ആവശ്യത്തിന് ബസുകളില്ലാത്തത് കെ.എസ്.ആർ.ടി.സിയെ പ്രതിസന്ധിയിലാക്കുന്നുണ്ട്. ജില്ലയിലെ പ്രധാന റൂട്ടുകളിൽ ബസുകൾ തകരാറിലായാൽ പകരം സർവീസ് നടത്താൻ ഓർഡിനറി ബസുകളില്ലാത്ത സ്ഥിതിയാണ്. വിവിധ പ്രദേശങ്ങളിൽനിന്ന് പുതിയ സർവീസുകൾക്കായുള്ള ആവശ്യവും ശക്തമാണ്.

നിലവിൽ ബജറ്റ് ടൂറിസത്തിനും വിനോദസഞ്ചാര ആവശ്യങ്ങൾക്കുമായി ഉപയോഗിക്കുന്ന ബസുകൾ താത്കാലികമായി സാധാരണ സർവീസുകൾക്ക് വിന്യസിച്ചാണ് യാത്രാക്ലേശം പരിഹരിക്കാൻ ശ്രമിക്കുന്നത്. എന്നാൽ വിദ്യാർഥികൾ, തൊഴിലാളികൾ, ചെറുകിട വ്യാപാരികൾ എന്നിവർ പ്രധാനമായും ആശ്രയിക്കുന്ന ഗ്രാമീണ റൂട്ടുകളിൽ കൂടുതൽ ബസുകൾ അനുവദിക്കണമെന്ന ആവശ്യമുയരുന്നുണ്ട്.

സ്ത്രീകളുടെ യാത്രാസ്വാതന്ത്ര്യം വർധിപ്പിക്കുന്നതിനൊപ്പം പൊതുജനങ്ങൾക്ക് കെ.എസ്.ആർ.ടി.സിയിലുള്ള വിശ്വാസ്യത ഉയർത്താനും പദ്ധതിക്ക് സാധിച്ചിട്ടുണ്ട്. എങ്കിലും പദ്ധതിയുടെ ഗുണഫലം പൂർണമായി ജനങ്ങളിലെത്തിക്കാൻ കൂടുതൽ ഓർഡിനറി ബസുകളും ബദൽ സർവീസുകൾക്കുള്ള വാഹനങ്ങളും അടിയന്തരമായി അനുവദിക്കണമെന്നാണ് യാത്രക്കാരുടെ ആവശ്യം.