‘പറയാനുള്ളത് പാർട്ടി വേദികളിൽ പറയണം’: അടൂർ പ്രകാശിന്റെ പരസ്യപ്രതികരണത്തിനെതിരെ കെ. മുരളീധരൻ

തിരുവനന്തപുരം: അടൂർ പ്രകാശിന്റെ പരസ്യപ്രതികരണത്തിനെതിരെ രൂക്ഷവിമർശനവുമായി മന്ത്രി കെ. മുരളീധരൻ. പറയാനുള്ള കാര്യങ്ങൾ മാധ്യമങ്ങൾക്കു മുന്നിലല്ല, പാർട്ടി വേദികളിലാണ് ഉന്നയിക്കേണ്ടതെന്ന് അദ്ദേഹം വ്യക്തമാക്കി.

തന്നെ അറിയിക്കേണ്ട കാര്യങ്ങളെല്ലാം മുഖ്യമന്ത്രി കൃത്യമായി അറിയിക്കാറുണ്ട്. ചില കാര്യങ്ങൾ പത്രം വായിച്ചാണ് അറിയുന്നതെന്ന് താൻ നേരത്തെ പറഞ്ഞപ്പോൾ വലിയ വിമർശനമാണ് നേരിട്ടത്. എന്നാൽ, ഇപ്പോൾ ശരം വിട്ടതുപോലെ എല്ലാവരും പരസ്യമായി അഭിപ്രായങ്ങൾ പറയുകയാണ്. തനിക്ക് നിലവിൽ അത്തരം പരാതികളൊന്നുമില്ലെന്നും മന്ത്രി കൂട്ടിച്ചേർത്തു.

സംസ്ഥാനത്ത് മരുന്ന് ക്ഷാമമുണ്ടെന്ന പ്രചാരണത്തിൽ കഴമ്പില്ലെന്നും സ്ഥിതിഗതികൾ സുരക്ഷിതമാണെന്നും കെ. മുരളീധരൻ പറഞ്ഞു. സർക്കാറിനെതിരായ കരിങ്കൊടി പ്രതിഷേധങ്ങളിൽ ഭയമില്ല. കരിങ്കൊടിയെ സ്വാഗതം ചെയ്യുന്നു. യൂത്ത് കോൺഗ്രസ് - യുവമോർച്ച സംഘർഷമുണ്ടായാൽ തങ്ങൾ ചിത്രത്തിൽനിന്ന് പുറന്തള്ളപ്പെടുമോ എന്ന ഭയമാണ് സി.പി.എമ്മിനെന്നും അദ്ദേഹം പരിഹസിച്ചു.

അതേസമയം, വി.ഡി. സതീശനെതിരെ കോൺഗ്രസിനുള്ളിലെ പടയൊരുക്കം കൂടുതൽ ശക്തമാകുകയാണ്. മുസ്‌ലിം ലീഗ് ഉൾപ്പെടെയുള്ള ഘടകകക്ഷികൾക്ക് കാബിനറ്റ് പദവി നൽകിയത്, സാംസ്കാരിക സ്ഥാപനങ്ങളുടെ തലപ്പത്തെ നിയമനങ്ങൾ, ആസൂത്രണ ബോർഡ് പുനഃസംഘടന എന്നിവയൊന്നും കേരളത്തിന്റെ ചുമതലയുള്ള എ.ഐ.സി.സി ജനറൽ സെക്രട്ടറി ദീപാദാസ് മുൻഷി പോലുമറിഞ്ഞില്ലെന്നാണ് വിവരം. മുഖ്യമന്ത്രിയുടെ തീരുമാനങ്ങൾ ഏകപക്ഷീയമാണെന്ന് കാട്ടി എ.ഐ.സി.സി നേതൃത്വത്തെ പരാതി അറിയിക്കാനാണ് മുതിർന്ന നേതാക്കളുടെ നീക്കം.