മാലിന്യം നീക്കുന്നതിനൊപ്പം വരുമാനവും; രണ്ടുവർഷം കിട്ടിയത് 15.79 ലക്ഷം രൂപ; മലപ്പുറത്ത് ഹരിത കർമസേനയുടെ പ്രവർത്തനം ശക്തം

മലപ്പുറം: മാലിന്യ നിർമാർജനത്തിനൊപ്പം വരുമാനവും ഉറപ്പാക്കി മലപ്പുറത്ത് ഹരിത കർമസേനയുടെ പ്രവർത്തനം കൂടുതൽ ശക്തിപ്പെടുന്നു. വീടുകളിൽനിന്ന് ശേഖരിക്കുന്ന മാലിന്യങ്ങൾ മെറ്റീരിയൽ കളക്ഷൻ ഫെസിലിറ്റികളിൽ (എം.സി.എഫ്) എത്തിച്ച് തരംതിരിച്ച ശേഷമാണ് ക്ലീൻ കേരള കമ്പനിക്ക് കൈമാറുന്നത്. പുനരുപയോഗിക്കാൻ സാധിക്കുന്ന മാലിന്യങ്ങൾക്ക് നിശ്ചിത തുക വിലയായി ലഭിക്കുമ്പോൾ, ഉപയോഗശൂന്യമായവ ശാസ്ത്രീയവും സുരക്ഷിതവുമായ രീതിയിൽ സംസ്‌കരിക്കുകയും ചെയ്യുന്നു.

മാലിന്യമുക്ത അന്തരീക്ഷം സൃഷ്ടിക്കുന്നതിനോടൊപ്പം സേനാംഗങ്ങൾക്ക് നിശ്ചിത വരുമാനം ലഭ്യമാക്കാൻ സാധിക്കുന്നുവെന്നതാണ് പദ്ധതിയുടെ പ്രധാന നേട്ടം. 2024-25, 2025-26 സാമ്പത്തിക വർഷങ്ങളിലായി ജില്ലയിലെ വിവിധ തദ്ദേശ സ്ഥാപനങ്ങളിലെ ഹരിത കർമസേനാംഗങ്ങൾക്ക് 15.79 ലക്ഷം രൂപ വരുമാനമായി ലഭിച്ചു. നടപ്പു സാമ്പത്തിക വർഷത്തിൽ (2026-27) ഇതുവരെ 4.41 ലക്ഷം രൂപ കൈമാറി.

2022 ഏപ്രിൽ മുതൽ 2025 ഒക്ടോബർ വരെയുള്ള കാലയളവിൽ ജില്ലയിൽനിന്ന് 12,962.49 ടൺ മാലിന്യമാണ് ക്ലീൻ കേരള കമ്പനി വഴി നീക്കം ചെയ്തത്. 2025-26 സാമ്പത്തിക വർഷത്തിൽ ഏപ്രിൽ മുതൽ ഒക്ടോബർ വരെയുള്ള മാസങ്ങളിൽ മാത്രം 2,430.86 ടൺ മാലിന്യം ശാസ്ത്രീയമായി സംസ്‌കരിക്കാൻ സേനയ്ക്ക് സാധിച്ചു.